Ağstafada dərman istəyən arvadını döyərək öldürən şəxs ələ keçdi – YENİLƏNİB +
FOTO/VİDEO
Ağstafada arvadını döyərək öldürən şəxs saxlanılıb.
Bu barədə Cixisyolu.com-a DİN-in Mətbuat Xidmətinin Gəncə regional qrupunun baş
inspektoru polis kapitanı Eşqin Qasımov məlumat verib.
Qeyd edilib ki, aprelin 8-də Ağstafa rayon sakini, 1988-ci il təvəllüdlü Günel
Məmmədovanın müxtəlif bədən xəsarətləri alaraq xəstəxanaya yerləşdirilməsi
barədə məlumat daxil olub.
Rayon Polis Şöbəsində araşdırmalar başlanılaraq müvafiq ekspertiza təyin olub.
“İlkin araşdırmalar nəticəsində məlum olub ki, yumruq və təpiklə zərərçəkənə
həyat yoldaşı Ayaz Məmmədov xəsarət yetirib. Aprel ayının 13-də G. Məmmədovanın
ata evində ölməsi ilə bağlı Ağstafa Rayon Polis Şöbəsinin və Prokurorluğunun
əməkdaşları hadisə yerinə gələrək müvafiq araşdırmalar aparıb.
Hazırda ölümün səbəblərinin müəyyən edilməsi istiqamətində ekspertiza təyin
olunub.
Hadisəni törətməkdə şübhəli bilinən Ayaz Məmmədov polis əməkdaşları tərəfindən
saxlanılıb, araşdırmalar davam etdirilir”- deyə məlumatda bildirilib.
17:05
“Bacımı əri ilə qayınanası döyüblər”.
Bunu Lent.az-a açıqlamasında Ağstafada döyülərək öldürülən 35 yaşlı Günel
Məmmədovanın qardaşı Ramin Həsənov deyib.
“Bacımın uşağı xəstəlikdən əziyyət çəkir. Ona görə də dövlət onun aylıq
dərmanlarının alınması üçün 300 manat müavinət təyin edib. Ailə də hər ay həmin
kartdan 260 manatı çıxarıb kreditə verirdi. Aprelin 8-də bacım Günel əri
Məmmədov Ayaz Kərəm oğluna deyib ki, kartdan pul çıxarmağa gedirsən onsuz, elə
uşağa dərman da al. Əri də deyib ki, dərman 20 manatdır. Bahadır, necə alım?
Həmin məsələyə görə Ayazla anası Güneli döyüblər. Təpiklə bədəninin müxtəlif
nahiyələrinə zərbə endiriblər. Bacımın ağzından və qulağından qan gəlirdi”, –
R.Həsənov bildirib.
Onun sözlərinə görə, Günel Məmmədova aprelin 8-dən xəstəxanada yatıb:
“Dünən axşam artıq can verirdi. Ağsaqqallar məsləhət etdilər ki, evə gətirək.
Bu gün səhər Dağ Kəsəmən kəndində, mənim evimdə vəfat etdi”.
10:44
Ağstafa rayonunda ər arvadını döyərək öldürüb.
Pravda.az-ın əldə etdiyi məlumata görə, hadisə bir neçə gün əvvəl rayonun
Aşağı Kəsəmən kəndində qeydə alınıb.
Belə ki, kənd sakini Ayaz Məmmədov münaqişə zəminində arvadı, rayonun Dağ
Kəsəmən kənd sakini Günel Həsənovanı təpik və yumruq zərbələri ilə vuraraq
döyüb. Bədəninin müxtəlif nahiyələrində ağır xəsarət almış yaralı Ağstafa Rayon
Mərkəzi Xəstəxanasına yerləşdirilib.
Günel Həsənova bu gün səhər saatlarında dünyasını dəyişib.
Qeyd edək ki, hadisəyə səbəb qadının ərindən aptekdən dərman almasını istəməsi
olub.
Cütlüyün bir azyaşlı qız övladı var.
