Rusiyalı fiqurlu konkisürən Alina Zaqitova Pyanqçanqda keçirilən Olimpiya Oyunlarında qadınlar üzrə fiqurlu konkisürmə yarışında çempion olub.
ÇıxışYolu.Com xəbər verir ki, 15 yaşlı idmançı sərbəst proqramı mükəmməl şəkildə yerinə yetirərək, 239,57 bal toplayıb.
Digər rusiyalı idmançı Yevgeniya Medvedyeva isə 238,26 balla gümüş medalın sahibi olub. Fəxri kürsüdə son yeri (bürünc medal) – 231,02 bal toplamış kanadalı idmançı Ketlin Osmond tutub.
Fevralın 21-də təqdim olunan proqramda milliyyətcə udmurt olan Alina Zaqitova üstün olub. O, dünya rekordunu təzələmiş Medvedyevadan sonra buz üzərinə çıxaraq, həmyerlisinin nəticəsini təzələməyi bacarıb. Zaqitova hakimlərdən 82.92 bal alıb.
Bu, rusiyalı atletlərin Olimpiyada qazandığı ilk qızıl medal sayılır. Rusiya Olimpiya atletləri komandasının aktivində buna qədər beş gümüş və səkkiz bürünc mükafat olub.
Qeyd edək ki, Pyanqçanqda keçirilən Qış Olimpiya Oyunları fevralın 25-də yekunlaşır.