A kateqoriyası alan azərbaycanlı hakim: “Təmsilçiliyimiz nümunəvi olmalıdır”
Bizim WhatsApp kanalımıza buradan abunə ola bilərsiniz
“Hakim qismində təmsilçiliyimiz nümunəvi olmalıdır”.
Bunu “Report”a açıqlamasında Beynəlxalq Şahmat Federasiyası tərəfindən A
kateqoriyalı hakimlik lisenziyası alan İlahə Qədimova
Azərbaycan Şahmat Federasiyasının hakimi bunun böyük etimad olduğunu bildirib:
“Uzun illər bu məqsədə doğru addımlamışam. A kateqoriyalı hakim olaraq daha
nüfuzlu yarışlarda işləmək imkanı qazanıram. Mənə göstərilən yüksək etimadı
doğrultmaq üçün səylə çalışacağam. Vaxtilə şahmatçı kimi Azərbaycan millisində
çıxış etmişəm. İndi isə hakim kimi ölkəmi təmsil edəcəyəm”.
O, beynəlxalq dərəcəli hakimlərin sayının çox olmasını arzulayır:
“Azərbaycan şahmatçıları daim ölkəmizi beynəlxalq arenada layiqincə təmsil
ediblər. Çox istərdim ki, gələcəkdə şahmatda beynəlxalq dərəcəli hakimlərimiz
çox olsun”.
Qeyd edək ki, İlahə Qədimovaya qədər yalnız Azərbaycan Şahmat Federasiyasının
1-ci vitse-prezidenti Faiq Həsənov A kateqoriyasına sahib olub.