Adrian Mutu: “Azərbaycan çempionatı çoxlarının təsəvvür etdiyindən fərqlidir”
Bizim WhatsApp kanalımıza buradan abunə ola bilərsiniz
“Azərbaycan çempionatı çoxlarının təsəvvür etdiyindən fərqlidir”.
“Report”un məlumatına görə, bunu “Neftçi”nin baş məşqçisi Adrian Mutu ölkəsi
Rumıniyanın “iAMSport” nəşrinə açıqlamasında deyib.
44 yaşlı mütəxəssis Premyer Liqada bu mövsüm gərgin mübarizə getdiyini
bildirib:
“Hər şey qaydasındadır. Burada futbol Rumıniya ilə müqayisədə daha çox fiziki
gücə əsaslanır. Liqanın səviyyəsi yaxşıdır. Əvvəlki illərdə 1-2 komanda
fərqlənirdisə, bu mövsüm daha çox balans var. Beş iddialı komanda çıxış edir”.
Mutu qış fasiləsində Rumıniyanın ÇFR klubuna keçəcəyi ilə bağlı yayılan
söz-söhbətlərə də aydınlıq gətirib. O, bu məlumatı təkzib edib:
“Bununla bağlı heç bir müzakirə aparılmayıb. Mövzuya toxunmağın mənası yoxdur”.
Qeyd edək ki, Adrian Mutunun rəhbərliyi altında bu mövsüm Premyer Liqada
keçirdiyi 15 oyunda 22 xal toplayan “Neftçi” turnir cədvəlinin 6-cı pilləsində
qərarlaşıb. Rumıniyalı mütəxəssisin bakılılarla müqavilə müddəti 2025-ci ilin
yayına qədərdir.