ATV-də “SƏHNƏ” açılır: Fəxrəddin Manafov aparıcı olacaq – VİDEO
Bizim WhatsApp kanalımıza buradan abunə ola bilərsiniz
Sənət xiridarlarının səbirsizliklə gözlədiyi, teatr sənətinə həsr olunan və
tam fərqli bir üslubda hazırlanan “Səhnə” adlı layihə yanvarın 6-da saat
22:00-da ATV telekanalında yayımlanacaq.
Cixisyolu.com xəbər verir ki, həyat həqiqətlərini əks etdirən səhnə ilə, teatrla
bağlı bir çox televiziya layihələri olub.
Lakin “Səhnə” layihəsi tam fərqli yanaşmada tamaşaçıların mühakiməsinə
veriləcək. Səhnə və kulis, yaradıcılıq axtarışları, səhnə korifeylərimizin
həyat və sənət dünyası, eyni zamanda, Azərbaycan teatrının keçdiyi tarixi yol,
milli teatrımızın inkişaf mərhələləri kimi məqamlar yeni layihənin əsas
hədəflərindəndir.
Maraqlı məqamlardan biri də odur ki, layihənin ideya müəllifi və rəhbəri də,
verilişin aparıcısı da məhz sənət dünyasının məşhur simalarıdır. Belə ki,
layihənin rəhbəri tanınmış teatr rejissoru, prodüser Ələkbər Tağızadə,
aparıcısı isə Xalq artisti Fəxrəddin Manafovdur.
Qloballaşma, internet və özündə milyonlarla informasiya daşıyan sosial
şəbəkələr, bayağı kontentlər hərdən insanlarda əsil sənət və sənətkar
kriteriyalarını elə aşındırır ki, bəzən mənəvi qida tələbatı belə arxa plana
keçir. Eləcə də, sənətlə bağlı fikir mübadilələri, mübahisələr, düşüncələr,
axtarışlar da müasir insanın gündəmindən çıxır.
Məhz belə bir dönəmdə tamaşaçılara təqdim olunacaq “Səhnə” telelayihəsi
teatrımızın keçmiş şöhrətini özünə qaytarmaqla yanaşı, əsil sənət xiridarı olan
yüksək zövqlü tamaşaçı da formalaşdırmağa çalışacaq.
Bir sözlə, bir-birindən maraqlı sənət hekayələrini izləmək istəyirsinizsə,
yanvarın 6-da, saat 22:00-da ATV kanalında “Səhnə”yə baxın.