Azərbaycanda kişi qadınların 80 minlik qızılını götürüb yoxa çıxdı
Sumqayıtda qadınlara qarşı külli miqdarda dələduzluq edilib.
Lent.az xəbər verir ki, dələduzluqda təqsirləndirilən R.Əliyev Sumqayıt
şəhərində yerləşən “Cavid” ticarət mərkəzində qızıl satan R.Əhmədovaya külli
miqdarda ziyan vurub.
Belə ki, o, əvvəlcə ondan nisyə qızıl alaraq, satıb və pulunu qaytarıb. Bu
yolla o, qadın satıcının etibarını qazanıb. Növbəti dəfə də 45 539 manatlıq
qızılı nisyə götürüb. Ancaq budəfəki qızılların pulu sahibinə qaytarılmayıb.
R.Əliyev qızıl alverçisi olan digər zərərçəkmiş G.Ağayevaya da eyni üsulla 34
960 manat ziyan vurub.
Aldadıldığını görən zərərçəkmişlər hüquq-mühafizə orqanlarına üz tutublar.
Nəticədə R.Əliyev barəsində Cinayət Məcəlləsinin 178.2.2-ci (dələduzluq təkrar
törədildikdə) maddəsi ilə cinayət işi başlanıb.
Hazırda iş üzrə məhkəmə istintaqı davam edir.