0b23fad8-93be-42ff-b6e7-c7ef2fd801c0..jpg

Azərbaycanda məhbusların məzuniyyətə buraxılma qaydası və müddəti açıqlanıb – REPORTAJ + FOTO

Baxış sayı: 599 dəfə baxılıb.

Azərbaycanda məhbusların məzuniyyətə buraxılma qaydası və müddəti açıqlanıb –
REPORTAJ + FOTO
Bizim WhatsApp kanalımıza buradan abunə ola bilərsiniz

Azərbaycanda qanunçuluq, demokratiya və humanizm prinsiplərinə, dünya
təcrübəsinə əsaslanan ədliyyə sisteminin yaradılması istiqamətində aparılan
islahatlar davam edir.

AZƏRTAC mövzu ilə bağlı Ədliyyə Nazirliyinin Penitensiar Xidmətinin 4 saylı
cəzaçəkmə müəssisəsindən reportaj hazırlayıb.

Cəza-icra siyasəti humanistləşdirilərək məhkumların və təqsirləndirilən
şəxslərin hüquq və imtiyazları genişləndirilir. Onların saxlanma şəraiti, qida,
tibbi və digər təminatları yaxşılaşdırılır.

Məhkumların əvvəllər də cəzaçəkmə müəssisələrinin hüdudlarından kənara çıxma
praktikası olub. Hazırda isə mövcud qanunun daha da geniş formada tətbiq
edilməsinə başlanılıb.

Belə ki, ümumi rejimli cəzaçəkmə müəssisələrində cəza çəkən və ilk dəfə az
ağır, böyük ictimai təhlükə törətməyən cinayətlərə görə məhkum olunan, müsbət
xarakterizə edilən, əməyə cəlb olunan məhkumların cəzalarının ən azı 1/3
hissəsini çəkdiyi təqdirdə 7 günədək ailə üzvlərinin yaşadığı ünvana, yəni
məzuniyyətə buraxıla bilər.

Penitensiar Xidmətin İctimaiyyətlə əlaqələr şöbəsinin rəisi Namik Həsənov
açıqlamasında məhkumların məzuniyyətə buraxılması praktikası haqqında danışıb:

“Məhkumların cəzaçəkmə müəssisələrindən kənara çıxması ilk deyil. Belə ki,
müsbət davranışlı azyaşlıların həvəsləndirmə qaydasında ölkə ərazisində
keçirilən mədəni-kütləvi, idman tədbirlərində iştirakını, eyni zamanda, şəhər
gəzintisinə çıxarılmalarını təmin etmək məqsədilə onlar müəssisə hüdudlarından
çıxıblar. Həmçinin az ağır və böyük ictimai təhlükə törətməyən cinayətlərə görə
məhkum olan məhbuslar qohumluq borclarını yerinə yetirməsi ilə əlaqədar ailə
üzvlərinin dəfn və yas məclislərində iştirak etmələri üçün müəssisə
hüdudlarından kənara buraxılıblar. Hazırda isə bu qanun daha geniş formada
tətbiq edilir. Məzuniyyət səfərlərinə yalnız ölkə ərazisi hüdudlarında icazə
verilir. Bu zaman yola sərf olunan iki gün nəzərə alınmır”.

Namik Həsənov məhkumların və təqsirləndirilən şəxslərin hüquq və
imtiyazlarının genişləndirilməsi, saxlanma şəraitlərinin yaxşılaşdırılması
istiqamətində həyata keçirilən bu cür islahatların gələcəkdə də davam edəcəyini
diqqətə çatdırıb.

Məzuniyyət haqqından istifadə edəcək Sevda Əliyeva öz təəssüratlarını
bölüşərək bildirib ki, bu xəbəri eşidərkən sevincdən ağlayıb:

“Məzuniyyətə çıxan kimi qısa müddət öncə rəhmətə gedən övladımın məzarını
ziyarətə gedəcəyəm”. Sevda Əliyeva bu şansı onlara verdiyi üçün ölkə başçısına
hər gün dua etdiyini deyib: “Allah Prezidentimizdən razı olsun. Artıq öz
cəzaçəkmə borcumun iki ilini tamamlamışam. Azadlığa buraxılandan sonra
Vətənimə, cəmiyyətimə layiqli bir vətəndaş olacağam”.

Cəzaçəkmə müəssisəsinin digər məhkumu Sona Axundova da AZƏRTAC-ın əməkdaşı ilə
söhbət zamanı göz yaşlarını saxlaya bilməyib. Sözlərinə göz yaşları ilə davam
edən məhbus məzuniyyət zamanı ata və anasının məzarını ziyarət edəcəyini
söyləyib.

Source link