Lənkəran Ağır Cinayətlər Məhkəməsində qətl törətməkdə təqsirləndirilən Tələt Dadaşovun cinayət işi üzrə məhkəmə prosesi başa çatıb.
ÇıxışYolu.Com xəbər verir ki, prosesdə hökm oxunub.
Hökmə əsasən, T. Dadaşov 19 il müddətinə azadlıqdan məhrum edilib.
Qeyd edək ki, Daxili İşlər Nazirliyinə bu il martın 19-da Lənkəran Şəhər-Rayon Polis Şöbəsinə Lerik rayon sakini Mirisa Babayevin martın 16-da yaşadığı Sütəmurdov kəndi ərazisində itkin düşməsi barədə müraciət daxil olub.
Polis və prokurorluq orqanlarının əməkdaşları tərəfindən həyata keçirilən istintaq və əməliyyat-axtarış tədbirləri nəticəsində M. Babayevin həmin gün Aşağı Nüvədi qəsəbəsində yaşayan T. Dadaşovun evində olarkən aralarında baş vermiş münaqişə zəminində sonuncu tərəfindən küt alətlə qətlə yetirildiyi, meyitinin isə zirzəmidə basdırıldığı müəyyən edilib.
M. Babayevin meyiti ekshumasiya edilib.
Görülmüş tədbirlərlə cinayəti törətməkdə şübhəli bilinən T. Dadaşov tutulub və barəsində həbs-qətimkan tədbiri seçilib.
Etibar Məmmədov
www.ÇıxışYolu.Com