Azərbaycan gələn ay Minskdə keçiriləcək II Avropa Oyunlarında ilk dəfə qadın samboçu ilə təmsil olunacaq.
Bu barədə ÇıxışYolu.Com-a Azərbaycan Sambo Federasiyasının prezidenti Ceyhun Məmmədov məlumat verib.
Onun sözlərinə görə, Gözəl Zutova Azərbaycanı sambo yarışlarında təmsil edəcək. Bununla da Azərbaycanı Avropa Oyunlarında təmsil edəcək samboçuların sayı yeddiyə çatıb. Belə ki, altı nəfər kişi idmançımız da 22-23 iyun tarixlərində Minskdə keçiriləcək sambo yarışlarında mübarizə aparacaq.
Qeyd edək ki, 34 yaşlı Gözəl Zutova daha çox güləşçi kimi tanınıb. Zaqatala güləş məktəbinin yetirməsi olan Zutova 2011-ci ildə Bakıda Heydər Əliyevin xatirəsinə həsr olunmuş Qızıl Qran-Pri beynəlxalq turnirinin gümüş medalını qazanıb. O, 2015-ci ildə Bakıda keçirilmiş ilk Avropa Oyunlarında qadın güləşində (-75 kq) ölkəmizi təmsil etsə də, ilk görüşdə uduzaraq mübarizəni dayandırıb.
Gözəl Zutovanın adı bu ay Bakıda keçirilmiş cüdo üzrə Böyük Dəbilqə turnirinin ilkin sifariş ərizəsində (+78 kq) yer alsa da, sonradan onun bu yarışda iştirak etməyəcəyi müəyyənləşmişdi.
Səbuhi MUSAYEV