“Azersky” peykinə görə sığorta ödənişi bu ilin sonuna qədər veriləcək
Rəqəmsal İnkişaf və Nəqliyyat Nazirliyi yanında Kosmik Agentliyin
(“Azərkosmos”) istismar etdiyi, missiyasını vaxtından bir il əvvəl başa
çatdırmış “Azersky” – Yerin məsafədən müşahidə peykinə görə sığorta ödənişi bu
ilin sonuna qədər veriləcək.
Bunu “Report”a açıqlamasında “Azərkosmos”un İdarə Heyətinin sədri Saməddin
Əsədov bildirib.
“Bu məsələdə 10-dan çox xarici sığorta şirkəti iştirak etdiyi üçün proses uzun
çəkir, amma bu ilin sonuna qədər ödəniş olacaq. Məbləğ kommersiya sirri olduğu
üçün açıqlanmır”, – deyə o qeyd edib.
S.Əsədov onu da bildirib ki, orbitə buraxılması planlaşdırılan “Azersky-2”
peyki əvvəlki peyklə müqayisədə ucuz başa gələcək, həm də daha keyfiyyətli
şəkil çəkəcək. Bununla belə, sədr yeni peykin dəyərinin nə qədər olduğunu
açıqlamayıb.