Əhalinin naratahçılığına səbəb olan səs yazısı saxtadır! “TAC” şirkətinin istehsalı olan “Gülüstan” limonadlarında vərəm çöpü aşkar edilməyib və satışdan yığışdırılması barədə göstəriş verilməyib.
Bunu ÇıxışYolu.Com-a açıqlamasında “TAC” şirkətinin marketinq və kommunikasiyalar şöbəsinin rəhbəri Sürəyya Verdiyeva bildirib.
Yayılmış səs yazısında bildirilir ki, “Gülüstan” şirələrində vərəm çöpləri tapılıb və əhaliyə bir müddət bu məhsulları almamaq tövsiyə olunur.
“Qida Təhlükəsizliyi Agentliyi tərəfindən “TAC” MMC-nin istehsalı olan heç bir məhsulla bağlı hal-hazırda araşdırılma aparılmır, nə də heç bir zaman vərəm çöpü tapılmayıb. Bu, şirkətimizə qarşı aparılan “qara” kampaniyadır”, – deyə S.Verdiyeva açıqlama verib.
“TAC” əhalini keyfiyyətli içməli su və sərinləşdirici içkilərlə təmin etmək üçün Azərbaycanda yaradılmış ilk şirkətdir. Daim yüksək keyfiyyət standartlarına sadiq qalan “TAC” şirkəti “Gülüstan” limonadlarının qablaşdırılmasını dünyada tanınmış qida məhsulları xətlərinin istehsalı ilə məşğul olan Almaniyanın “Krones” avadanlığı ilə həyata keçirir.
Bu texniki avadanlıq bütün istehsal prosesinin idarə olunması və ona nəzarəti insan müdaxiləsi olmadan, müasir elektron avadanlıqlar vasitəsilə həyata keçirməyə imkan verir. 20 ildən artıq bazarda mövcud olmağımız, habelə beynəlxalq İSO 9001:2008 və İSO 22000:2015 sertifikatlarımız buraxdığımız məhsulların həm yüksək keyfiyyəti, həm də təhlükəsizliyinə dəlalət edir. “Gülüstan” gündəlik istifadə üçün nəzərdə tutulmuş yüksək keyfiyyətə malik məhsuldur”, – deyə S.Verdiyeva izah edib.
S.Verdiyeva vurğulayıb ki, “TAC” şirkəti, hər zaman olduğu kimi, müştərilərinə açıqdır, istehsal prosesi ilə yaxından tanış olmaq istəyənlər üçün zavoda ekskursiya təşkil oluna bilər. Eyni zamanda, tərkibindən əmin olmaq üçün “Gülüstan” limonadları istənilən laboratoriyada yoxlanıla bilər.
