Məşhur ABŞ-li reper və prodüser Diddi (əsl adı Şon Kombs) ilə bağlı yenidən
səs-küylü qalmaqal yaranıb.
Nyu-York əyalət məhkəməsinə irəli sürülən yeni iddialara görə, musiqiçi
2005-ci ildə 10 yaşlı uşağa və 2008-ci ildə 17 yaşlı oğlana qarşı cinsi
istismarda ittiham olunur.
Bu barədə Cixisyolu.com “Reuters”ə istinadən xəbər verir.
Mülki iddia vəkil Toni Buzbi tərəfindən qaldırılıb və o, 150-dən çox zorakılıq
qurbanını təmsil etdiyini bildirir. Vəkilin sözlərinə görə, o, artıq Diddiyə
qarşı ən azı 17 iddia qaldırıb.
“Bu, yalnız başlanğıcdır. Biz bütün qurbanlar üçün ədalətə nail olmaq
niyyətindəyik”, – deyə Buzbi “Reuters”ə müsahibəsində qeyd edib.
İkinci iddiada başqa bir ittihamçı 2008-ci ildə 17 yaşında ikən “Making the
Band” realiti-şousunun dinləmələrində iştirak etdiyini və bu zaman Kombs, eyni
zamanda onun mühafizəçisi tərəfindən cinsi zorakılığa məruz qaldığını deyib.
Hadisələrin təfərrüatı hələlik açıqlanmayıb.
Diddinin vəkilləri bütün ittihamları qəti şəkildə rədd edirlər.
“Bu iddianın arxasında duran vəkil həqiqətin ortaya çıxmasında deyil, medianın
diqqətinin cəlb edilməsində maraqlıdır. Məhkəmədə həqiqət qalib gələcək. Kombs
heç vaxt cinsi təcavüz və ya insan alveri ilə məşğul olmayıb”, – deyə Şon
Kombsun vəkillərinin bəyanatında bildirilir və bu bəyanatlar daha əvvəlki
məhkəmə iddialarından sonra verilənlərlə oxşarlıq təşkil edir.