Bakıda silahlı insident: İki nəfərin güllələndiyi yerdən CANLI YAYIM –
YENİLƏNİB
Nəsimi rayonu, Səməd Vurğun küçəsində baş vermiş silahlı insidentlə bağlı
hazırda Baş Prokurorluq və Daxili İşlər Nazirliyinin əməkdaşları hadisə
yerindədilər.
Baku TV-nin hadisə yerində olan müxbirinin verdiyi məlumata görə, silahlı
insident nəticəsində üç nəfər xəsarət alıb və bir avtomobilə ziyan dəyib.
Canlı yayımı təqdim edirik:
15:43
Bakının Səməd Vurğun küçəsində silahlı atışmada yaralanan şəxslərdən biri
tələbədir.
Cixisyolu.com-ın əldə etdiyi məlumata görə, 2002-ci il təvəllüdlü Fəqan Rəhimli
Azərbaycan Tibb Universitetinin tələbəsidir.
Məlumatı Cixisyolu.com-a ATU-nun mətbuat xidmətindən təsdiq ediblər.
15:31
Bakıda silahlı insidenti törətməkdə şübhəli bilinən bir nəfər tutulub.
Bu barədə Cixisyolu.com-a DİN-dən məlumat verilib.
İctimaiyyətə əlavə məlumat veriləcək.
15:23
Bakıda silahlı insident zamanı xəsarət alanların kimlikləri məlum olub.
DİN-dən Cixisyolu.com-a verilən məlumata görə, xəsarət alanlar – 2002-ci il
təvəllüdlü Fəqan Rəhimli, 1983-cü təvəllüdlü Tamerlan Hüseynovdur.
Onlar xəstəxanaya çatdırılıblar.
15:02
Bakıda silahlı insidentlə bağlı yeni məlumat üzə çıxıb.
Cixisyolu.com-ın əldə etdiyi məlumata görə, yaralananlardan ikisi təxminən 20-25
yaşlarında olan oğlandır. Onların hər ikisi ayaq nahiyəsindən güllə yarası alıb.
Yaralılar təcili tibbi yardım avtomobili ilə Kliniki Tibbi Mərkəzin
reanimasiya şöbəsinə yerləşdiriliblər.
TƏBİB-dən verilən məlumata görə, baş verən hadisə ilə əlaqədar Bakı Şəhəri
Təcili və Təxirəsalınmaz Tibbi Yardım Stansiyasının briqadaları əraziyə cəlb
edilib.
Əlavə məlumat veriləcək.
14:57
Bakıda silahlı insidentin baş verdiyi ərazidən görüntülər yayılıb.
Cixisyolu.com-ın əldə etdiyi görüntülərdə iki nəfərin qan içində yerdə uzandığı əks
olunub.
Həmçinin videoda polislərin hadisə yerində olduğu görünür.
Cixisyolu.com-ın əldə etdiyi məlumata görə, silahlı şəxs hadisə yerindən qaçıb.
Daxili İşlər Nazirliyindən verilən məlumata görə, Nəsimi rayonunda üç nəfərin
odlu silahdan açılan atəşdən yaralanması barədə polisə məlumat daxil olub.
14:45
Bakıda silahlı insident olub.
Cixisyolu.com xəbər verir ki, hadisə Səməd Vurğun küçəsində qeydə alınıb.
İnsident zamanı silahlı şəxs(lər)in iki nəfəri güllələdiyi iddia edilir.
DİN Mətbuat Xidmətindən Cixisyolu.com-a bildirilib ki, hadisə yerinə polis briqadası
cəlb edilib.
Hadisə yerinə polis və təcili tibbi yardım briqadaları cəlb olunub.
Araşdırma aparılır.
Könül Cəfərli