Beynəlxalq Futbol Tarixi və Statistikaları Federasiyasının (IFFHS) tərtib
etdiyi cədvəldə milli komanda və qitəmiqyaslı klub turnirlərində ən azı 8 qol
vuranlar yer alıblar. “Qarabağ”ın futbolçusu Olaviyo Juninyonun qolları qeydə
alınmayıb.
Cixisyolu.com xəbər verir ki, siyahıya “Olimpiakos”un mərakeşli hücumçusu Ayub
Al-Kaabi başçılıq edir. 15 qol vuran afrikalı klubda 11, yığmada 4 dəfə
fərqlənib.
“Əs-Sədd”in qətərli forvardı Akram Afif ikinci, “Bavariya”nın ingilis ulduzu
Harri Keyn üçüncüdür. Onların hər ikisi 14 dəfə fərqlənib.
“Qarabağ”ın bombardiri Olavio Juninyo avrokuboklarda ümumilikdə 9 qol vursa
da, siyahıya daxil edilməyib. Buna təsnifat mərhələlərinin qollarının nəzərə
alınmamağı səbəb olub. Əsas raundlarda 3, təsnifatda 6 dəfə fərqlənən
braziliyalı bu üzdən cədvəldən kənar düşüb.
Qeyd edək ki, yalnız 19 futbolçu ilin ilk 9 ayında 8 və ya daha çox qol
vurmağı bacarıb.