Son illər boşanmaların sayı artıb. Artıq mütəxəssislər bununla bağlı müxtəlif
fikirlər səsləndirir, çözümlər təklif edirlər. Boşanmalar hər iki tərəflə
yanaşı, uşaqlara da ciddi təsirlərini göstərir.
Psixoloqlar gələcəkdə uşağın psixologiyasında mənfi halların yaranmaması üçün
boşanan cütlüklərə məsləhətlər edirlər.
Bizim.media-ya mövzu ilə bağlı danışan psixoloq Ofelya Məmmədovanın sözlərinə
görə, boşanma prosesi ən çox uşaqlara təsir edir:
“Onların boşanma müddətində və sonradan bir çox mənfi vəziyyətlə üz-üzə qala
bildikləri ortaya çıxıb. Uşaqlarda ana-ata ayrılığının yaratdığı stres,
ümumilikdə ayrılığın sonrakı ilk günlərində deyil, daha sonrakı vaxtlarda da
ortaya çıxa, hətta bu travma illər sonra da davam edə bilər. Ata-ananın
boşanması uşaqların psixoloji vəziyyətinə, yaşlarına görə təsir edir”.
Psixoloq qeyd edib ki, bir-üç yaş arası uşaqlar boşanma vəziyyətini başa
düşməsələr belə, onların psixoloji vəziyyətlərində dəyişiklik baş verir:
“Əvvəlkinə baxanda daha tez-tez və çox ağlayırlar. Yuxu problemləri, yerini
islatmaq, barmaq əmmək, qorxu və narahatlıq hiss etmək, narahatedici hərəkətlər
müşahidə oluna bilər. Üç-altı yaş arası olanlar isə hər şeydə özlərini
günahlandırırlar, onlarda əsəb gərginliyi artır, hansı valideynlə yaşayırlarsa,
ona qarşı aqressiv olurlar. Yuxu problemləri ola, gecələr kabus görə bilərlər.
Boşanma prosesində 6-11 yaş arası uşaqlar özlərini aldadılmış hiss edirlər.
Evdən ayrılan valideynin qayıdacağına ümid edirlər. Ayrı qalan valideynlərinin
artıq onları istəmədiyni düşünə, baş və qarın ağrılarından şikayət edə, yuxu
vaxtları pozula bilər. Onlar boşanmada səbəbkar bildikləri birlikdə yaşadıqları
ana, ya da atanı günahlandırırlar. Valideynləri boşanan 12-16 yaş arası
uşaqlarda isə əsəb, hirs, kin, təcavüzkarlıq, özünəqapanma halları, diqqət
toplamaqda çətinlik çəkmək, insanlara qarşı güvənsizlik, sosial fobiya kimi
psixoloji narahatlıqlar görünə bilər”.
Psixoloq vurğulayıb ki, valideynlər arasındakı anlaşılmazlıqlar və mübahisələr
uşağın inkişafına mənfi təsir edir:
“Uşaq ana və atasını birlikdə görmək istəyir və ana-ata birlikdə olduqda
xoşbəxt olur. Ancaq uşağın sağlam inkişafı üçün valideynlərin eyni evdə
birlikdə yaşamalarından çox, onların münasibətlərinin xüsusiyyətləri önəmlidir.
Bu səbəbdən boşananların ayrı-ayrılıqda ana-ata rollarını davam etmələri uşaq
üçün daha yaxşı nəticələr göstərir.
Əgər boşanan valideynlər uşağın ehtiyaclarını qarşılayır, məsuliyyətlərini
yerinə yetirir, uşağa sevgi və güvən verməyə davam edirlərsə, uşağın boşanmadan
təsirlənməsi də az olur. Boşanma müddətində uşaqda fizioloji, psixoloji və
davranış problemləri ortaya çıxmaması üçün bu reaksiyalara vaxtında müdaxilə
edilməlidir. Lazımi tədbirlər görülsə, uşaq boşanma prosesinin öhdəsindən daha
asanlıqla gələ bilər”.
Ofelya Məmmədova qeyd edib ki, valideynlər boşanarkən uşaqlardan silah kimi
istifadə etməməlidirlər:
“Uşaqlara valideynlərin boşanmasının ata-ananın, sadəcə, birlikdə olmadığı,
lakin onların əvvəlki kimi atası və anası olduğunu həm söhbət, həm də
davranışlarında göstərməlidirlər. Ailədaxili ünsiyyət, sevgi və diqqət bu və
buna bənzər problemlərin aradan qaldırılmasına mane ola bilər. Lakin uşağın
boşanmadan daha az təsirlənməsi üçün bütün tədbirlər görülməlidir. Belə bir
vəziyyətdə mütəxəssisdən kömək alınması həm ana, həm ata, həm də uşaq üçün
faydalı ola bilər”.