AVRO-2020-nin seçmə mərhələsinin II turunun ilk günü arxada qalıb.
ÇıxışYolu.Com xəbər verir ki, C qrupunun iki görüşü baş tutub.
Şimali İrlandiya gözlənildiyi kimi Belarusu məğlub edib (2:1) və 6 xalla vahid qrup lideri olub.
Gecənin maraqla gözlənilən qarşılaşması Niderlandın paytaxtı Amsterdamda baş tutub. Burda Hollandiya Almaniya millisini qəbul edib. Matç gözləniləndən də maraqlı alınıb. Almanlar ilk hissədə 2:0 öndə olsa da, fasilədən sonra hollandlar hesabı bərabərləşdirib. Lakin görüşün əsas vaxtının son dəqiqəsində Niko Şultsun vurduğu qol almanlara ilk seçmə oyunda üç xalı qazandırıb.
G qrupunda da iki görüş keçirilib. Varşavada Polşa Latviyanı 2:0 məğlub edib. Bu görüşü Əliyar Ağayevin başçılıq etdiyi hakimlər briqadası idarə edib. FIFA referimiz bu görüşdə ikisi polyaklara, dördü latışlara olmaq şərtilə altı sarı vərəqədən istifadə edib. Bu qrupda Polşa 6 xalla vahid qrup liderinə çevrilib.
Lyublyanada isə Sloveniya Şimali Makedoniyanın müqavimətini qıra bilməyib və ardıcıl ikinci dəfə 1:1-lik heç-heçəyə razılaşmalı olub.
Gecənin digər görüşü I qrupunda baş tutub. Belçika səfərdə Kipri 2:0 məğlub edib. Dünya üçüncüsü olan belçikalılar bununla da yüzfaizlik nəticə ilə vahid liderə çevrilib.
Səbuhi MUSAYEV