Karate üzrə əsas milli komandamızın üzvlərindən Asiman Qurbanlı (+84 kq) və Ayxan Mamayev (-84 kq) Avstriyanın Zalsburq şəhərində keçirilən mötəbər Seriya A karate turnirində müxtəlif medallara sahib olub.
ÇıxışYolu.Com xəbər verir ki, A.Qurbanlı yarışın qalibi kimi qızıl medal və kubok qazanıb. A.Mamayev isə bürünc mükafatçı olub.
Bürünc medal uğrunda həlledici görüşə qatılan Firdovsi Fərzəliyev (-60 kq) isə son saniyələrdə ukraynalı rəqibi Valeri Tumakovun mübahisəli zərbəsi ilə hesabda üstünlüyü əldən verib.
1-3 mart tarixlərində Dünya Karate Federasiyasının (WKF) nüfuzlu yarışlarından Seriya A turnirinin bu mövsüm ilk mərhələsində rekord sayda – 99 ölkədən 2057 karateçi iştirak edib. Beynəlxalq hakim Cahangir Babayev final görüşlərini idarə edən xüsusi referilər qrupuna daxil edilib.
Qeyd edək ki, milli komandamızı 28-31 martda İspaniyanın Quadalaxara şəhərində Avropa çempionatı gözləyir.