Vətəndaşların Şıx çimərliyinə daxil olması üçün qoyulan maneələr – qapı, şlaqbaumlar çıxarılıb.
Bu barədə ÇıxışYolu.Com-a Bakı Şəhər İcra Hakimiyyətinin Ticarət və Xidmət Departamentindən məlumat verilib.
Bildirilib ki, Bakının müxtəlif ərazilərindən çimərliklərdə qoyulan maneə ilə bağlı BŞİH-ə şikayətlər daxil olub. BŞİH-in Ticarət və Xidmət Departamenti reydlərə başlayıb.
Şıx çimərliyində insanların çimərliyə daxil olması üçün qoyulan lövhə, qapı, şlaqbaumlar götürülüb. Sahibkarlara bu barədə xəbərdarlıq olunub.
Departamentdən qeyd edilib ki, çimərlik zonalarında dəniz çimərliyinə girişin pulsuz olması barədə elan lövhələri quraşdırılacaq.
Qeyd edək ki, bir neçə gün öncə ÇıxışYolu.Com və Baku TV-nin əməkdaşı çimərliklərdə giriş üçün pul tələb edildiyi ilə bağlı məlumatı işıqlandırıb.
İlhamə Əbülfət