Əslən Özbəkistanlı, Rusiyanın “Blackstar” leyblı altında çıxış edən hip-hop janrının mahir ifaçısı Doni təxəllüsü ilə tanınan repçi Dostonbek İslamov dincləyicilərini təəccübləndirmək üçün fərqli addım atıb.
ÇıxışYolu.Com xəbər verir ki, Doni azərbaycanlı meyxanaçı Elsevər Qəmlinin mahnısını virtual duet şəklində lentə alaraq rəsmi “Youtube” hesabında yayımlayıb.
Beş il öncə aprelin 11-də “Youtube” videohostinqdə yüklənilib və altı milyon baxış toplayan “У моей девушки день рождения” (Mənim sevgilimin ad günündür) adlı mahnı Doninin diqqətini çəkib. Rusiyalı repçi bəstənin nəqarət hissəsini götürərək üstünə rep yazıb və bütov şəkildə mahnını izləyicilərin ixtiyarına verib.
“Bəzi ifaçılar bu mahnını fərqli təqdim etdilər. Amma mən bəstənin ilk ifaçısı Elsəvər Qəmli ilə əlaqə saxlayıb, mahnıya başqa yöndən yanaşdım. Nəticədə trek yüksək keyfiyyətdə ərsəyə gəldi”, – deyə Doni qeyd edib.
Ötən gün “Youtube”a yüklənən trekə mindən çox bəyənmə, 11 mindən çox isə izlənmə gəlib.
Diqqətçəkən məqam isə bir çox izləyicilərin “ara musiqisi” kimi tanıyan bu mahnını kifayət qədər məşhur rusiyalı ifaçı tərəfindən bəyənilib oxunması olub.
Rəşad Əliyev