Cüneyt Çakır Gürcüstan Mərkəzi Hakimlər Şurasının sədri oldu
Gürcüstan Futbol Federasiyası Cüneyt Çakırın Mərkəzi Hakimlər Şurasının sədri
təyin olunduğunu açıqlayıb.
FIFA kateqoriyalı keçmiş hakim Gürcüstanın 1-ci və 2-ci Liqa hakimləri ilə
görüşə qatılıb.
Gürcüstan Futbol Federasiyasına təşəkkür edən və hakimlərə üz tutan Çakır
etimada görə təşəkkür edib.
“Bu vəzifə mənə təklif olunarkən gözəl söhbətimiz oldu. Gürcüstan Futbol
Federasiyasının rəhbərliyi hakimliklə bağlı baxışlarını, planlarını və
fikirlərini mənimlə bölüşdü. Bu müsbət münasibət əsas məsələdir, bu gün burada
olmağımın səbəbidir. Karyeram boyu bir çox böyük matçlarda və turnirlərdə
iştirak etmişəm. Dayanıqlı uğur həmişə mənim əsas məqsədim olub. Bizim birinci
məqsədimiz davamlı uğura doğru addımlar atmaq olacaq. Hakim hazırlığında
beynəlxalq standartları tətbiq edəcəyik və beynəlxalq oyunlara daha çox hakimi
cəlb etməyə çalışacağıq. Biz bütün klublara, oyunçulara və məşqçilərə hörmət
edirik və meydanda da eyni hörməti gözləyirik. Məqsədimiz bütün hakimləri ölkə
çempionatının oyunlarına ən yaxşı şəkildə hazırlamaqdır. Biz qonşuyuq və burada
olduğum müddətdə ölkələrimiz arasında daha güclü əlaqələrin qurulmasını
istəyirəm. Bu, mənim üçün böyük şərəf olacaq”, – deyə Çakır bəyan edib.
Gürcüstan Futbol Federasiyasının baş katibi Davit Mujiri qeyd edib ki, Çakır
Gürcüstanda yaşayacaq və hakimlərin inkişafı üçün həyata keçirilən bütün
layihələrin önündə gedəcək.
“Mən məmnunam. Onun bu illər ərzində beynəlxalq arenada topladığı təcrübənin
Gürcüstanda bu istiqamətin inkişafı üçün faydalı olacağını düşünürəm”, –
federasiyanın baş katibi bildirib.
Mənbə: NTV Spor