Daşkəsəndə evdə ana və altı aylıq körpəsinin ölümü ilə nəticələnən yanğın hadisəsinin bəzi təfərrüatı məlum olub.
ÇıxışYolu.Com Report-a istinadla xəbər verir ki, Qabaqtəpə kəndində ata mülkündə yaşayan 1975-ci il təvəllüdlü Abdullayeva Lətifə Mürsəl qızı və altı aylıq oğlu Həsənli Əli İlqar oğlunun meyiti yanmış halda ikimərtəbəli evin birinci mərtəbəsindəki otaqların birində aşkar edilib.
Körpənin meyiti yanmış uşaq arabasında, qadının cəsədi isə yerdə olub. Evdə yanğın əlaməti yalnız meyitlərin olduğu yerdə qeydə alınıb.
2016-cı ildə Həsənov İlqar Eldar oğlu ilə ailə həyatı quran L.Abdullayeva əri ilə birgə ata evində yaşayıb. Həmin mülk atasının ölməmişdən əvvəl etdiyi vəsiyyətə görə onun adına keçirilib.
Qadının həyat yoldaşı bir gözündən əlildir. Ailə əlilliyə görə verilən əmək pensiyası və təsərrüfatdan gələn gəlir hesabına dolanıb.
İ.Həsənov faciə baş verən zaman tanışları ilə birgə Daşkəsən şəhərində olduğunu, yoldaşı və övladının ölüm xəbərini isə yaxınlarından aldığını bildirib. Ailənin heç kimlə düşmənçiliyi olmayıb.
Lakin qadın ilə qardaşları arasında atadan qalan mülkə görə narazılıq olub. L.Abdullayevanın üç qardaşı var. Onlardan Rafiq Abdullayev adlı biri rayonun Astaf kəndində müəllim işləyir, Tofiq Abdullayev ad-soyadlı digər qardaş ticarətlə məşğuldur, başqa biri isə fiziki qüsurludur və Bayan kəndində yaşayır.
Qardaşlardan, əsasən qonşuluqda yaşayan Rafiq Abdullayev və Tofiq Abdullayev bacılarının ata mülkündə öz həyat yoldaşı ilə yaşamasına əvvəllər bir neçə dəfə etiraz ediblər. Məhz bu səbəbdən L.Abdullayevanın qardaşları ilə arasında soyuq münasibət yaranıb.
Lakin onlar da baş verən faciədən xəbərsiz olduqlarını və hadisənin intihar məqsədilə törədildiyini düşündüklərini bildiriblər. L.Abdullayevanın anası və bacısı hadisənin intihar olduğunu bildiriblər.
Bununla belə, hadisənin kimsə tərəfindən qətl məqsədilə törədildiyi istisna olunmur.
Faktla bağlı Daşkəsən Rayon Prokurorluğunda araşdırmalara başlanılıb.
00:17
Daşkəsəndə ölüm hadisəsi baş verib.
ÇıxışYolu.Com APA-ya istinadla xəbər verir ki, hadisə rayonun Qabaqtəpə kəndində baş verib.
Mayın 9-da saat 18:00 radələrində kənd sakini, 1975-ci il təvəllüdlü Həsənova Lətifə Mürsəl qızı və onun altı aylıq oğlu Əli İlqar oğlu Həsənovun yanmış meyitləri yaşadıqları evdə aşkarlanıb.
Məlumata görə, qadın yataq otağının döşəməsində uşaq isə beşikdə yanmış vəziyyətdə olub. Hadisənin qətl olduğu bildirilir.
Kənddə Həsənovlar ailəsində ər arvadın mehriban olduqları və kiminləsə düşmənçilik etmədikləri bildirilir. Qətl törədilən gün qadının həyat yoldaşı Daşkəsən şəhərində olsa da, hazırda hüquq-mühafizə orqanlarının əməkdaşları onu sorğu-sual edirlər.
Faktla bağlı Daşkəsən rayon Prokurorluğunda cinayət işi açılıb, araşdırma aparılır.