Tələbə, təhsil kreditləri ilə bağlı məsələ artıq həllini tapmalıdır. İnsanlarımız, xüsusilə, övladları ali məktəblərdə ödənişli təhsil alan imkansız valideynlərimiz bu məsələnin həllini çox sərbsizliklə gözləyirlər.
Bunu ÇıxışYolu.Com-a açıqlamasında millət vəkili Vahid Əhmədov deyib.
O, həmkarı Əli Məsimli ilə hələ bir xeyli müddət öncə bu məsələnin həlli yönündə “Təhsil kreditləri haqqında” qanun layihəsi hazırladığını və onun üzvü olduğu İqtisadi siyasət, sənaye və sahibkarlıq komitəsinin iclasının müzakirəsinə çıxarılmasına nail olunduğunu xatırladıb.
“Biz illərdir ki, bu vacib məsələni deyirik, gündəmə gətiririk, artıq danışmaqdan da bezmişik, deyiləcək sözümüz qalmayıb. Təhsil, tələbə kreditləri məsələsi, nəhayət, həllini tapmalıdır.
Kasıb ailələr, imkansız ailələrin övladları, valideynlər bu məsələnin həllini gözləyirlər. Onlar da artıq yorulublar. İnsanları nə qədər gözlətmək olar axı? Həmkarım Əli Məsimli ilə bir neçə il öncə müvafiq qanun layihəsi hazırladıq, parlamentə, komitəmizə göndərdik.
Hətta, komitəmizdə onun ilkin müzakirəsinə də nail olduq. Hamı da, bütün cəmiyyət də bəyəndi, razılıqla qarşıladı.
Ondan sonra isə bu məsələ sanki daşa dirəndi, hər dəfə sessiyalar da başlayanda deyirik, ancaq ortada hələ də heç nə yoxdur.
Bu gün heç kimə sirr deyil ki, ali təhsil alan tələbələrin, yüksək ballarla tələbə adını qazananların çoxu kasıb, imkansız ailələrin uşaqlarıdır.
Ancaq onların böyük bir qismi maddi imkansızlıq üzündən ya heç ali təhsil dalınca getməyiblər, ya da ödəniş edə bilmədikləri üçün kursda saxlanıblar, ya da təhsillərini yarımçıq saxlamaq məcburiyyətində qalıblar. Bəs onların çəkdikləri əziyyətlər, aylarla keçirdikləri yuxusuz gecələr, repetitorlara boğazlarından kəsib verdikləri pullar necə olsun? Bunları kim və nə ilə kompensasiya edəcək?
Ona görə hesab edirəm ki, artıq bu məsələ yoluna qoyulmalıdır.
Bildiyim qədər parlamentin Elm və təhsil komitəsi də belə bir qanun layihəsi üzərində işləməyi planlaşdırır.
Hətta, qanunu “Tələbə kreditləri haqqında” adlandırmağı düşünürlər.
Olsun, fərq etməz, təki tezliklə qanun layihəsi bizim hazırladığımız sənəddən də istifadə olunmaqla hazırlansın və parlamentin payız sessiyasının müzakirəsinə çıxarılaraq, qəbul edilsin”-deyə, V. Əhmədov sözlərinə əlavə edib.
Kamil HƏMZƏOĞLU
www.ÇıxışYolu.Com