Dövlət Məşğulluq Agentliyi ötən il 77 mindən çox işsiz və işaxtaran şəxsi işlə
təmin edib – FOTO
2021-ci ildə Əmək və Əhalinin Sosial Müdafiəsi Nazirliyinin tabeliyindəki
Dövlət Məşğulluq Agentliyi tərəfindən 77640 nəfər işsiz və işaxtaran şəxs işlə
təmin edilib.
Bu barədə Əmək və Əhalinin Sosial Müdafiəsi Nazirliyi məlumat yayıb.
Bu barədə məşğulluq sahəsində ötən ilə dair fəaliyyətin yekunlarına və qarşıda
duran vəzifələrə həsr olunmuş iclasda qeyd edilib.
Əmək və əhalinin sosial müdafiəsi naziri Sahil Babayev əhalinin məşğulluq
imkanlarının artırılmasının Prezident İlham Əliyevin sosial-iqtisadi
siyasətində mühüm yer tutduğunu vurğulayıb, aktiv məşğulluq proqramlarının
genişləndirilməsinin 2022-ci ildə də əsas hədəflərdən olduğunu qeyd edib.
İclasda bildirilib ki, ötən il 16232 şəxs özünüməşğulluq proqramına cəlb
olunmaqla, onların seçdikləri biznes istiqamətləri üzrə aktivlərlə təminatı
işləri aparılıb. Bu da proqramın icrasına başlandığı 2017-ci ilə nisbətən 13,6
dəfə çoxdur.
Həmçinin Nazirlik və Dünya Bankının birgə icra etdiyi “Azərbaycanda məşğulluğa
dəstək” layihəsi iştirakçılarının aktivlərlə təminatına da artıq başlanıb. Bu
layihə özünüməşğulluq proqramının daha da genişlənməsinə mühüm dəstək olaraq,
22 min işsiz şəxsin özünüməşğulluq formasında kiçik biznes qurmasına dəstək
olacaq.
2021-ci ildə Dövlət Məşğulluq Agentliyi tərəfindən əməkhaqqının birgə
maliyyələşdirilməsi proqramına 491 nəfər, peşə hazırlığı kurslarına 988 nəfər,
peşəyönümü məsləhət xidmətlərinə 1886 nəfər cəlb olunub. 3734 nəfərə isə
işsizlikdən sığorta ödənişi verilib.
Vətən müharibəsində şəhid olmuş qəhrəmanlarımızın ailələrinin, müharibə
əlilləri və iştirakçılarının, erməni terrorundan zərər çəkən mülki şəxslərin,
onların ailə üzvlərinin məşğulluğuna dəstək işləri də qeyd edilib. Postmüharibə
dövründə bu kateqoriyalara aid 10 minədək şəxsin məşğulluğuna dəstək
göstərildiyi, o cümlədən 6 minədək şəxsin özünüməşğulluq proqramına cəlb
edildiyi, 4 minədək şəxsin işlə təmin olunduğu diqqətə çatdırılıb.
Bu günlərdə Agentliyin Bakı Peşə Hazırlığı Mərkəzinin ISO beynəlxalq
sertifikatı aldığı və ölkəmizdə ilk ISO sertifikatlı peşə hazırlığı müəssisəsi
olduğu qeyd edilib, artıq yaxın vaxtlarda bu standart üzrə peşə hazırlığının
təşkil ediləcəyi bildirilib.
İclasda əsas prioritetlərdən biri kimi məşğulluq xidmətlərinin rəqəmsal
platformasının qurulması və keyfiyyətinin artırılması, aktiv məşğulluq
proqramlarının daha da genişləndirilməsi sahəsində görülmüş işlərdən, 2022-ci
ildə Dövlət Məşğulluq Agentliyi qarşısında duran vəzifələrdən də bəhs olunub.
