DSX-nin hərbi helikopterinin qəzaya uğramasından və 14 nəfərin şəhid
olmasından iki il keçir
Bizim WhatsApp kanalımıza buradan abunə ola bilərsiniz
Dövlət Sərhəd Xidmətinin (DSX) hərbi helikopterinin Xızı rayonu ərazisində
yerləşən “Qaraheybət” aviasiya poliqonunda təlim uçuşları yerinə yetirərkən
qəzaya uğramasından iki il ötür.
Cixisyolu.com bildirir ki, helikopter 2021-ci il noyabrın 30-da saat 10:40
radələrində təlim uçuşları yerinə yetirərkən qəzaya uğrayıb.
Qəza nəticəsində 14 nəfər həlak olub, iki nəfər yaralanıb.
Həlak olan hərbi qulluqçuların adları:
1. polkovnik Füzuli Əli İbram oğlu Cavadov;
2. polkovnik Emil Nəzir oğlu Nəzirov;
3. mayor Elmir Mircəlil oğlu Həsənov;
4. mayor Elbrus Səmrəddin oğlu Əhmədov;
5. mayor Emil Şahid oğlu Mayılov;
6. mayor Murad Yaşar oğlu Məmmədov;
7. mayor Emil Elman oğlu Əliyev;
8. tibb xidməti kapitanı Ceyhun Xanlar oğlu Əhmədxanov;
9. kapitan Cavid Əhliman oğlu Bayramlı;
10. kapitan Xəyyam Əlixan oğlu Əliyev;
11. kapitan Teymur Ənvər oğlu Qaraisayev;
12. leytenant Abdulla Telman oğlu Süleymanov;
13. baş leytenant Fərid Təyyar oğlu Nağıyev;
14. işçi Elçin Fikrət oğlu Nəbiyev.
Hadisə zamanı polkovnik-leytenant Emil Məmməd oğlu Cəfərov və kapitan Ramin
Ramiz oğlu Ədilov yaralanıblar.
Onların ikisi də hazırda hərbi xidmətlərini davam etdirirlər.
Qeyd edək ki, həlak olan hərbçilərə şəhid statusu verilib.
Faktla bağlı Baş Prokurorluğun İstintaq idarəsində Cinayət Məcəlləsinin 352.2
(uçuş və ya uçuşa hazırlıq qaydalarını pozma ehtiyatsızlıqdan iki və ya daha
çox şəxsin ölümünə səbəb olduqda) və digər maddələri ilə cinayət işi başlanıb.
Cinayət işi üzrə Baş Prokurorluğun və Dövlət Sərhəd Xidmətinin rəhbərliyinin,
eləcə də məhkəmə-ballistik, məhkəmə-texniki-yanğın və məhkəmə-tibb
ekspertlərinin iştirakı ilə hadisə yerinə baxış keçirilib. Müdafiə
Nazirliyindən cəlb olunan mütəxəssis tərəfindən “qara qutu”nun götürülməsi
təmin edilməklə onun tədqiqi aparılıb.
Müəyyən olunub ki, ekipaj heyəti tərəfindən helikopter havaya qalxdıqdan 16
dəqiqə 59 saniyə sonra marşrut üzrə meydançaya eniş etmək qərarı qəbul edilib,
həmin vaxt helikopterin sürəti 141 km/saat, radiohündürlük (yer səthindən
helikopterə olan məsafə) 101 metr olub.
Uçuşun 17 dəqiqə 10-cu saniyəsində küləyin istiqamətinin düzgün nəzərə
alınmadan eniş prosesinə başlanılması nəticəsində helikopterin uçuş
parametrlərində əhəmiyyətli dərəcədə dəyişikliklər baş verib və uçuş sürəti 0
km/saat, radiohündürlük 89 metr qeydə alınıb.
Bundan ötən qısa müddət ərzində pilotlar helikopteri qəza vəziyyətindən
çıxarmaq üçün cəhd etsələr də, buna nail ola bilməyiblər.