FIFA rəhbərinin təklifini ilk yerinə yetirən ölkə məlum oldu – FOTO
Stadiona futbol əfsanəsi Pelenin adının verilməsini qərara alan ilk ölkə
Kabo-Verde oldu.
Bu barədə ölkənin Baş naziri Uliss Korreyra Silva özünün sosial şəbəkə
hesabından məlumat verib.
Onun sözlərinə görə, əvvəllər “Kabo-Verde Milli Stadionu” adlanan 15 min
nəfərlik arena bundan sonra “Pele Stadionu” adlanacaq.
Silva bu qərarı ölkəsinin Braziliya tarixi və mədəniyyəti ilə ayrılmaz əlaqəsi
ilə izah edib.
“Kabo-Verde və Braziliyanın əl-ələ verən tarixi və mədəniyyəti var. Bunlar həm
dil, həm də digər sahələrdə bağlı olan iki qardaş ölkədir”, – deyə hökumət
başçısı bildirib.
Qeyd edək ki, Kabo-Verde Atlantik okeanda bir neçə əsr Portuqaliyanın
müstəmləkəsi olmuş ada dövlətidir. Ölkənin milli komandası FIFA reytinqində
72-ci yeri tutur.
Xatırladaq ki, FIFA prezidenti Canni İnfantino bütün dünya ölkələrindən
stadionların ötən il dekabrın 29-da dünyasını dəyişən əfsanəvi braziliyalının
şərəfinə adlandırılmasını xahiş etmişdi.
Mənbə: Live Result
