Gürcü politoloq: “Azərbaycanın tarixi ərazilərini bərpa etməsi gürcü xalqı və
dövləti üçün xoş bir haldır”
“Azərbaycan öz tarixi ərazilərini bərpa edib. Bu gürcü xalqı və dövləti üçün
də çox xoş bir haldır. Çünki, Gürcüstanın da bənzər problemləri var və
Azərbaycan nümunəsi gürcü xalqını ruhlandırır”.
Bu sözləri “Report”un yerli bürosuna gürcü politoloq Tengiz Txilava deyib.
Onun sözlərinə görə, Azərbaycan Prezidenti İlham Əliyevin region üçün təklif
elədiyi bütün strateji layihələrdə Gürcüstan aktiv iştirak edəcək.
“25 il bundan öncə Azərbaycan-Gürcüstan dostluğuna həm də strateji tərəfdaşlıq
əlavə olundu. Mühüm bir çox ortaq layihələri Azərbaycan Gürcüstanın iştirakı
ilə ölkəmizin ərazisindən keçməklə reallaşdırır”, – deyə politoloq vurğulayıb.
“Gürcüstan və Azərbaycan arasında bir çox ortaq nöqtələr var. Bunlardan ən
vacibi isə çoxmillətlilik və tolerantlıqdır. Azərbaycanda gürcü, erməni, rus,
yunan və digər xalqlar eyni hüquqlar çərçivəsində rahat şəkildə yaşayır.
Gürcüstanda da həmçinin azərbaycanlı, erməni, gürcü xalqları birgə yaşaya
bilirlər. Heç vaxt da onları heç kim sıxışdırmayıb”, – deyə politoloq qeyd edib.
Gürcü politoloq fəxrlə bildirib ki, ümummilli lider Heydər Əliyevin Gürcüstana
ziyarəti zamanı yerli ictimaiyyət nümayəndələri ilə görüşlərində iştirak edib:
“Daha sonra isə bir neçə dəfə cənab Prezident İlham Əliyevlə də görüşmüşəm.
Bakı və bölgələrində bir çox filmlər çəkmişəm. Özüm də şahidi olmuşam ki, Bakı
və digər şəhərlər necə inkişaf edib”.