“Hirkan meşələri” nominasiyası UNESCO-nun Ümumdünya İrs Komitəsinə təqdim
edilib
“Hirkan meşələri” nominasiyası UNESCO-nun Ümumdünya İrs Komitəsinə təqdim
edilib.
Cixisyolu.com xəbər verir ki, bunu TÜRKSOY-a üzv ölkələrin UNESCO üzrə Milli
Komissiyalarının 9-cu iclasında ekologiya və təbii sərvətlər naziri Muxtar
Babayev deyib.
O iclas iştirakçılarının diqqətinə çatdırıb ki, Hirkan meşələri Xəzər
dənizinin cənub-qərb və cənub sahillərini əhatə edən meşə massividir:
“Bu meşələr Pleystosen dövründə buzlaşmaya məruz qalmış və planetimizdə öz
unikallığını qoruyub saxlaya bilən nadir ekosistemlərdən biridir. Bu baxımdan
qədim relikt növlərlə zəngin olan Hirkan meşələrinin xüsusiyyətləri nəzərə
alınaraq UNESCO-nun Təbii İrs Siyahısına daxil edilməsi təklif edilib.
Bu məqsədlə hazırlanmış nominasiya sənədinə əsasən, Hirkan Milli Parkının
daxilində ümumi sahəsi 24 min hektar olan 3 ərazi əsas götürülməklə transmilli
“Hirkan meşələri” nominasiyası hazırlanıb və 2022-ci ilin sonunda UNESCO-nun
Ümumdünya İrs Komitəsinə təqdim edilib”.
Nazir qeyd edib ki, Yer kürəsində yayılmış 2500-dən çox palçıq vulkanından
350-yə qədəri Azərbaycanın payına düşür və ölkəmiz dünya üzrə bu sahədə
özünəməxsus yer tutur:
“Bu səbəbdən TÜRKSOY-a üzv dövlətlərin UNESCO üzrə milli komissiyalarının 8-ci
iclasında qəbul edilmiş qətnaməsinə uyğun olaraq, Azərbaycan ərazisində
geoparkların yaradılması və UNESCO-nun Qlobal Geoparklar Şəbəkəsinə qoşulması
istiqamətində işlərə başlanılıb.
İnanırıq ki, palçıq vulkanları əsaslı geoparkın yaradılması ölkədə geoturizmin
inkişafına və Azərbaycanın palçıq vulkanlarının ən çox yayıldığı ölkə kimi
tanınmasına təkan verəcək”.