İraq və Kürdüstan muxtar bölgəsinin həbsxanalarında İŞİD qruplaşması ilə əlaqələrdə şübhəli bilinən 1500-ə yaxın azyaşlı saxlanılır.
BBC-nin məlumatına görə, bu barədə “Human Rights Watch” insan haqları təşkilatı hesabat dərc edib.
Hesabata görə, “şübhəlilər” azyaşlı olmalarına rəğmən, mükakimə olunmadan həbs olunur və sistematik olaraq inşgəncələrə məruz qalır. Uşaqların döyülərək etirafla bağlı ifadəni imzalamağa vadar edildiyi bildirilir.
Nə İraq, nə də Kürdüstan rəsmiləri hesabatı şərh edib.
53 səhifəlik sənədə əsasən, 2018-ci ilin sonuna olan göstəriciyə görə, İraqda azadlıqdan məhrum edilmiş İŞİD-lə əlaqələrdə şübhəli bilinən azyaşlılardan 185-i xarici ölkələrin vətəndaşlarıdır. Onlar terror ittihamları üzrə təqsirli bilinərək müxtəlif həbs cəzaları alıb.
“Belə çevik cəza tədbirlərini ədalət adlandırmaq olmaz. Bu ölçülər həmin uşaqların çoxunda mənəvi travma yaradacaq və gələcək həyatlarına mənfi təsir göstərəcək”, – HRW-un uşaq haqlarının müdafiə bölməsinin direktoru Co Beker bildirib.