Keçmiş məcburi köçkün: “Dörd yaşımda çətinliklə çıxdığım Füzuliyə indi
övladlarımla qayıdıram”
Bizim WhatsApp kanalımıza buradan abunə ola bilərsiniz
“Füzulidən çıxanda mənim dörd yaşım vardı, anamla çox çətinliklə çıxmışdıq
şəhərdən”.
Bunu Cixisyolu.com-a açıqlamasında bu gün Füzuli şəhərinə köç edən keçmiş məcburi
köçkünRəqsanə Yaşar qızı Məmmədova deyib.
O bildirib ki, anası ilə çıxdığı doğma yurda övladları ilə qayıdır:
“Çox istəyərdim ki, anam da bu günləri görsün, amma ömrü vəfa etmədi. Bu gün
anamsız, öz ailəmlə, övladlarımla qayıdıram doğma yurda. Bakıda Mərdəkan
qəsəbəsində yaşayırdıq, şükür ki, bu gün artıq məcburi köçkün adı bizim
üzərimizdən rəsmən götürülür. Artıq bizim gələcək planlarımız Füzuli ilə,
oradakı evimizlə, həyatımızla, yaşamımızla bağlıdır. Bu günləri bizə yaşatdığı
üçün Ali Baş Komandanımıza, müzəffər Ordumuza minnətdarıq. Allah şəhidlərimizə
rəhmət eləsin, qazilərimizə cansağlığı versin!”
Xatırladaq ki, bu gün növbəti köç karvanı Füzuli şəhərinə yola salınıb. Daha
30 ailə, 104 nəfər öz doğma yurduna köçürülür. Bununla da ümumilikdə 500
ailənin (1 854 nəfər) Füzuli şəhərində məskunlaşması təmin edilib.
Aytac Qasımova