Azərbaycan şahmatçısı Şəhriyar Məmmədyarov “ShamkirChess 2018” superturnirinin rəsmi saytına müsahibə verib.
ÇıxışYolu.Com həmin müsahibəni təqdim edir.
– Söhbətə Berlində keçirilən İddiaçılar Turnirindən başlamaq istərdik. Yaxşı başlanğıc olsa da, sonluq alınmadı…
– İddiaçılar Turnirində ilk dəfə favorit qismində göstərilirdim. Ən azı yarışın reytinq favoriti olduğumdan, qalib gəlməyə namizədlərdən biri idim. Ona görə çoxları Berlində yarışı I pillədə başa vuracağımı gözləyirdi.
Şahmat həvəskarları mənə inanırdı. Turnirin gedişatı göstərdi ki, qalib gəlmək imkanlarımız var. Güclü heyət olduğuna görə proqnoz vermək çətin idi. Yarışdan əvvəl demişdim ki, favorit şahmatçı sonuncu ola bilər, ya da əksinə. Çünki hər tur önəmli idi.
Turnir mənim üçün yaxşı başladı. İlk turda Sergey Karyakinə qalib gəldim. Ardınca da yaxşı oyunlarımız oldu. Sadəcə, etiraf etmək lazımdır – Fabiano Karuana inanılmaz qədər yaxşı mübarizə sərgilədi. Qara rənglərlə qələbələri çox oldu. Belə yarışda məhz qara rənglərlə üstünlük vacibdir.
Yarışın qalibi olmaq üçün ən önəmli oyun Dinq Lirenə qarşı oldu. İnanılmaz risk etdim. Ardıcıl bir neçə tur qələbə qazanmadım. O anda başa düşürdüm ki, qələbə lazımdır. Lirenlə partiyada əsası olmadan riskə getdim. Heç-heçə ilə də turnir cədvəlində lider olacaqdım.
Sadəcə, qələbə qazanmaq istəyirdim. Çünki qələbə ilə izləyicilərimi yarım xal qabaqlayacaqdım. Uduzmaq barədə düşünmədim və risk etdim. Bu oyun çox ağır zərbə oldu. Sonradan Aleksandr Qrişuka qalib gəlməklə vəziyyətim nisbətən düzəldi. Sadəcə, Dinqlə oyun karyeramda ən ağır məğlubiyyətlərdən biri kimi qaldı. Udsaydım, bəlkə də, İddiaçılar Turnirində qələbə qazanacaqdım.
– Sənin üçün İddiaçılar Turnirində sürpriz nə oldu?
– Yaxşı və pis cəhətdən sürpriz oldu. Levon Aronyanla Uesli So gözləniləndən aşağı oyun nümayiş etdirdi. Çox güclü şahmatçılardır. Sadəcə, Berlində özlərinə oxşamadılar. Son turlarda hər ikisinin həvəsdən düşdüyü hiss olunurdu.
Karyakin isə əksinə, dönüş yaratdı. İki məğlubiyyətdən sonra Sergeyin şansının olmadığını düşünürdülər. Amma Karyakin ardıcıl dörd qələbədən sonra liderliyə yüksəlməyi bacardı. Sergey çox böyük xarakter göstərdi. Fikrimcə, son illərin ən maraqlı İddiaçılar Turniri oldu. Son tur ərəfəsində dörd şahmatçı qələbə şansını saxlayırdı.
– Ermənistan şahmatçısı Aronyan çox zəif təsir bağışladı. Karuanayla hər iki görüşdə də məğlubiyyət acısı yaşadı…
– Karuana Aronyanla hər iki oyunda qələbə qazandı. Mən və Karyakin iki görüşü heç-heçə başa vurduq. Yəni Fabiano 2 xal, biz isə 1 xal qazandıq. Karuana üçün böyük üstünlük idi. Belə turnirlərdə bir rəqibdən iki xal qazanmaq böyük şans yaradır.
İkinci dövrədə Karuanayla partiyada Aronyanın yaxşı gedişləri var idi. Hətta Karuananın heç-heçə şansları qalmırdı. Müdafiə olunmaq çətin görünürdü. Amma Aronyan bu gedişi görmədi və uduzdu.
Vladimir Kramniklə oyunda da çox zəif təsir bağışladı. Çox güclü şahmatçıdır, onun belə oyunlarda uduzmağı zəif formada olduğunu göstərir. Mənim oyunum onunla alınmadı. Hər iki rənglə istənilən üstünlüyü qazanmadım.
– İddiaçılar Turnirində qələbə qazanmaq üçün Şəhriyara nə çatmadı? Bəlkə, bəxtin gətirmədi?
– Əgər belə mötəbər yarışda çempionluğun taleyi bir oyundan asılıdırsa, deməli, turnir alınıb. Dinqə qalib gəlsəydim, daha yaxşı olacaqdı. Sona qədər mübarizə apardım, İddiaçılar Turnirində reytinqimi artırdım. Amma bəxt sözü ilə razı deyiləm.
Bu gün Karuananın I pilləyə layiq olmasını qeyd etməliyik. Çox yaxşı formada idi. Karyakinə uduzsa da, oyununu itirmədi. Aronyanla Qrişuka qalib gəldi.
Maraqlıdır, yanvarda Veyk-An-Zee superturnirində iştirak etmişik. Karuana orada pis oynadı. Bəziləri belə zəif çıxışının davam edəcəyini söyləyirdi. Görünür, Veyk-An-Zee də artıq İddiaçılar Turnirini düşünürdü. Əsl gücünü Berlində göstərdi.
– Hazırlıqdan razı qaldınmı?
– İddiaçılar Turnirinə iştirakımız çox gec təsdiqlənir. Noyabrın sonuna yaxın bu yarışda olacağımız məlum oldu. Cəmi üç ay vaxtımız vardı. Amma il ərzində turnirlərə razılıq veririk, bu amil hazırlığa təsirsiz ötüşmür.
Berlindən əvvəl Moskvada Rusiyanın gənc şahmat ulduzlarına qarşı çıxış etdim. Çində yarışda iştirak etdim. Səudiyyə Ərəbistanında bir yarış oldu, ardınca Hollandiyada Veyk-An-Zee superturnirində, Almaniyada bundesliqada mübarizə apardım.
Moskvada Mixail Talın Memorialında, “Aeroflot” turnirnə qatıldım. Çox yarışda iştiraka razılıq vermişdim. Bu yarışlar iki ay vaxtımı aldı. İddiaçılar Turnirinə cəmi iyirmi gün hazırlaşa bildim. Çox az vaxt oldu. Bu müddətdə Qaxda təlim-məşq toplanışı keçdim.
Təlim-məşq olmayan günlərdə də köməkçilərim tapşırıqlar üzərində çalışırdılar. Gələcəkdə iştirakçılar daha tez təsdiqlənsə, çox yaxşı olar.
– Artıq 33 yaşın var. Bu amil növbəti mövsümdə İddiaçılar Turnirinə vəsiqə qazanmağa mane olmayacaq? Yəni həvəsdən düşmürsən?
– Şahmatda yaş fərqlidir. Futbolda 33 yaşında mundialda oynayanda, deməli, sənin son dünya çempionatındır. 37 yaşında futbol oynamaq çətindir. Şahmatda 33 yaş yaxşı dövr sayılır.
Vişvanatan Anand, Boris Qelfand kimi şahmatçılar sualınıza cavab ola bilər. Anand qırx yaşında gözəl oyun sərgiləyirdi. Dünya çempionu olanda belə yaşı az deyildi. Özümə gəldikdə bilirsiniz ki, şahmata gec başlamışam.
Turnirlərdə gec oynamağa başlamışam. Özümü şahmatda çox gənc hesab edirəm. Növbəti iki il ərzində çox şey dəyişə bilər. İddiaçılar Turnirinə vəsiqə qazanmaq son zamanlar çox çətinləşib. Məşqləri davam etdirəcəyəm. Bir ildən sonra hansı formada olduğum görünəcək.
Özümdə enerji və güc hiss edirəm. Tam hazır olduğumu düşünmürəm. Yüz faiz hazır olsaydım, Berlində qalib gələrdim. Amma məqsədim dəyişmir. Çalışacağam yaxın illərdə İddiaçılar Turnirinə vəsiqə qazanım və bu turniri çempion kimi başa vurum.
– Reytinq şahmatçı üçün nə dərəcədə önəmlidir?
– Əmsal çox vacibdir. Yüksək reytinqin olmayacaqsa, güclü turnirlərə dəvət almayacaqsan. Dünyanın ikincisi olduğum üçün özümü xoşbəxt hesab edirəm. Amma irəlidə Maqnus var. Karlsen çox güclü rəqibdir. Hamıya başağrısı olur.
Klassik, rapid və blitsdə dünya çempionudur. Səviyyəli və güclü rəqibdir. Ona qalib gəlmək çox çətindir. FİDE reytinqində II olduğum üçün ancaq I pilləyə yüksəlməyi əsas hədəflərimdən biri hesab edirəm.
– Artıq təmkinli oynayırsan. Risk etmirsən. Dəyişikliyin səbəbi var?
– Son turnirlərdə hamı deyir ki, qayıt köhnə oyun üslubuna. İddiaçılar Turnirində də dedilər. Şahmatçılar həmin Şəhriyar üçün çox darıxıb. Deyirlər, aqresivlik çatmır. Lakin fərqli mənzərə görünür.
Dinqlə risk etdim, nəticə hamıya məlumdur. Nəticə qazanmaq üçün risk də vacibdir. Amma lazım olan oyunda. Aqressivliklə dünya reytinqində beşliyə yüksəlmək mümkün deyil. Daxilimdə həmin Şəhriyar yaşamaqdadır. Yəqin, nə vaxtsa risk edən Şəhriyar qayıdacaq.
Çoxu düşünür ki, işlədiyim məşqçilərə oxşamağa başlamışam. Bir müddət Dreyevlə və Xalifmanla çalışmışam, onları nəzərdə tuturlar.
– Berlində olduğun vaxt Azərbaycandan dəstəyi hiss edirdin?
– Turnir vaxtı telefondan az istifadə eləyirdim. İstirahət günlərində sosial şəbəkələrə 2-3 dəqiqə vaxt ayırmışdım. Çoxlu paylaşımlar gördüm. Fikrimcə, Azərbaycan şahmatına heç vaxt belə dəstək olmayıb. Məncə, hamı inanırdı ki, İddiaçılar Turnirində qələbə çox yaxındır. Heç vaxt görmədiyim dəstəyi hiss etdim.
– Şəmkirdə Vüqar Həşimov Memorialının ikiqat qalibisən. Bu dəfə ilk iki yarışın çempionu Maqnus Karlsen də iştirak edəcək. Superturnirdə yenidən qələbə qazanmaq şanslarını necə qiymətləndirirsən?
– Çox maraqlı heyət formalaşıb. 2018-ci ildə iki dəfə məğlub olmuşam. Biri Aniş Qiriyə, digəri Dinq Lirenə. Hər ikisi Şəmkirdə yüksək yerlər uğrunda mübarizə aparacaq. Maqnusun təqdimata ehtiyacı yoxdur.
Veselin Topalov, Sergey Karyakin dünyanın güclü şahmatçıları sırasındadır. David Navara aqressiv oyun üslubuna məxsusdur, istənilən rəqibi dayandıra bilər. Çox istəyirəm, beşinci turnirdə də qələbə qazanım. Çünki Karlsenin iştirak etdiyi yarışda I olmaq başqadır.
Təşkilatçılara təşəkkür edirəm. Ancaq seçilən şahmatçıları dəvət ediblər. Çox istərdim Vüqar Həşimovun adına turnir ənənəvi olaraq hər il keçirilsin.
– Dinq Lirendən Berlindəki məğlubiyyət üçün revanş istəyirsən?
– Dünya şahmatında iki həmkarım üzərində qələbəm yoxdur. Dinq Liren və Vişvanatan Anand. Dinqlə oyunlarımız az olub. İlk dəfə Berlində məni məğlub etdi. Amma mən heç vaxt ona qalib gəlməmişəm. Klassik şahmatda onlarla bacarmamışam.
Revanş dedikdə, Şəmkirdə qarşılaşacağıq. Nəticəni zaman göstərəcək. Revanş yox, qələbə istəyirəm.
S.T.
www.ÇıxışYolu.Com