Məşhur kriptovalyuta birjasının təsisçisi 25 il müddətinə azadlıqdan məhrum
edildi
Bizim WhatsApp kanalımıza buradan abunə ola bilərsiniz
ABŞ-nin Nyu-York federal məhkəməsi Sem Benkman-Fridi 25 il həbs cəzasına
məhkum edib.
O, Baham adalarında yerləşən kriptovalyuta birjası “FTX”nin operatoru olan
“FTX Group”un qurucusu və baş direktoru olub.
Şirkət 11 noyabr 2022-ci ildə müflis olduğunu elan edib. Eyni zamanda, baş
direktor Sem Benkman-Fridin vəzifəsindən istefa verəcəyi açıqlanıb və şirkət
özü də kənar idarəetməyə keçib.
2022-ci ilin dekabrında Sem Benkman-Frid ABŞ-nin tələbi ilə Baham adalarında
saxlanılıb. Eyni zamanda, o, birjaya ümumilikdə 1,8 milyard dollar sərmayə
qoyan FTX investorlarını aldatmaq üçün bir sxem təşkil etməkdə ittiham edilib.
2023-cü ilin noyabrında Benkman-Frid Nyu-Yorkda münsiflər heyəti tərəfindən
FTX müştəri hesablarından milyardlarla dollar oğurlamaqda, həmçinin
kriptovalyuta müştərilərinin vəsaitlərini bank hesabında saxlayan “Alameda
Research” hedcinq fondunun kreditorlarını aldatmaqda günahkar bilinib. Bundan
əlavə, məhkəmə münsifləri Sem Benkman-Fridi FTX investorlarını aldatmaqda və
çirkli pulların yuyulmasında təqsirli bilib.
Ümumilikdə o, maksimum 115 il həbs cəzası nəzərdə tutan yeddi ittiham üzrə
təqsirli bilinib. Eyni zamanda, prokurorluq FTX-nin təsisçisinə 40 ildən 50
ilədək həbs cəzası istəyib.
Mənbə: kommersant.ru