Məşhurlar çətin sual qarşısında: Dörd milyonluq dəvət gəlsə…
Bizim WhatsApp kanalımıza buradan abunə ola bilərsiniz
Türkiyəli məşhur aktrisa Məryəm Üzərli Ər-Riyaddan olan bir ailə ilə 1 saatlıq
şam yeməyindən 4 milyon lirə (təxminən 212 min manat) əldə edib.
Teleqraf.com-un əməkdaşı “Bu qayda Azərbaycanda tətbiq edilsə, nə qədər
qonorar tələb edərsiniz?” sualı ilə məşhurlarımıza müraciət edib.
Cavabları təqdim edirik:
Xalq artisti Röya Ayxan: “Müğənninin işi səhnədə oxumaq, konsert verməkdir.
Məni görmək istəyən konsertimə gəlsin”.
Xalq artisti Faiq Ağayev: “İş ondadır ki, bu cür şam yeməkləri adətən xeyriyyə
məqsədi ilə edilir. Hansısa xeyriyyə kampaniyası olur. Təbii ki, Türkiyənin
ərazi miqyasını və şou-biznesini nəzərə almalıyıq. Bizdə bu sistem tətbiq
edilərsə, bu qiymət olmayacaq. Daha aşağı qiymət olacaq. Biz hazırda
Azərbaycanda mövcud olmayan qayda haqqında danışırıq. Bunu da nəzərə alın. Belə
bir təklif yoxdur ki, “ulduzlar”ımız da qiymət bildirsinlər. Xeyriyyə məqsədli
şam yeməkləri isə nə qədər çox olarsa, bir o qədər yaxşı haldır”.
“Avroviziya 2011”in qalibi Nigar Camal: “Mənə bir neçə dəfə belə təklif olub.
Şam yeməyinə və kofe içməyə dəvət ediblər. Mən qəbul etməmişəm”.
Müğənni Nura Suri: “Bu haqda düşünməmişəm. Azərbaycanda belə bir hal yoxdur,
bu, dünyada mövcuddur. Bilmirəm bizdə qəbul edilər, ya yox. Mövcud olmayan
sistem haqqında fikir bildirə bilmərəm”.