Milli QHT Forumu İlham Əliyevin siyasətinə dəstək bəyanatı qəbul edib
Bizim WhatsApp kanalımıza buradan abunə ola bilərsiniz
Yanvarın 10-da Milli QHT Forumunun Bakıda ümumrespublika yığıncağı keçirilib.
Forumda çıxış edən Milli QHT Forumunun prezidenti Rauf Zeyni vətəndaş
cəmiyyətinin inkişaf yolundan bəhs edib.
Bildirilib ki, Azərbaycan Milli QHT Forumu 25 ildir ki, ölkədə vətəndaş
cəmiyyəti quruculuğunda fəal iştirak edir. Hazırda Forum öz sıralarında
müxtəlif profilli 100-lərlə QHT-ni birləşdirir. Son 1 ayda Azərbaycan Milli QHT
Forumu respublikanın 5 regionunda – Lənkəranda, Qubada, Şəkidə, Gəncədə və
Naxçıvanda forumlar keçirib, bu forumlarda 250-dən çox yerli QHT iştirak edib.
Bu gün regional forumlara ümumrespublika forumu ilə yekun vurulur.
R.Zeyni qeyd edib ki, ölkə üzrə vətəndaş cəmiyyəti təsisatları ilə aparılan
bütün müzakirələrdə vahid mövqe və yekdil fikir ondan ibarətdir ki, son 20 ildə
Azərbaycan dövləti Prezidentİlham Əliyevin rəhbərliyi ilə ölkə tarixində heç
vaxt olmamış miqyasda böyük inkişaf yolu keçib.
Daha sonra Beynəlxalq Avrasiya Mətbuat Fondunun prezidenti Umud Mirzəyev,
“Zəfər” Şəhid Ailələrinə Dəstək İctimai Birliyinin sədri Sevinc Alızadə, Əlil
Təşkilatları İttifaqının sədri Davud Rəhimli, “Vətəndaşların Sosial Rifahı
Naminə” İctimai Birliyinin sədri İradə Rizazadə, Azərbaycan Respublikası
Gənclər Təşkilatları Milli Şurasının sədri Rafael Hacıbəyli, Qaçqın və Məcburi
Köçkün Gənclər Təşkilatının sədri Vüqar Qədirov çıxış edərək Azərbaycanın yeni
inkişaf mərhələsində vətəndaş cəmiyyətinin rolundan, ölkəmizin inkişafında
müxtəlif sahələrdə görüləcək işlərdən danışıblar, QHT-ləri fəal əməkdaşlığa
çağırıblar. Qeyd olunub ki, ötən 20 ildə Azərbaycan beynəlxalq aləmdə yüksək
nüfuz, etibar, hörmət qazanıb.
Daha sonra Milli QHT Forumunun bəyanatı qəbul olunub.
Bəyanatda deyilir:
“Məhz Prezident İlham Əliyevin rəhbərliyi, Ali Baş Komandanlığı ilə 30 ilə
yaxın işğal altında qalmış bütün torpaqlarımız azad olunub. Şuşada,
Xankəndində, Xocalıda Azərbaycan Bayrağı qaldırılıb. Bu, Azərbaycan xalqının
tarixində qızıl dövrün açılmasıdır. 200 ilə yaxındır ki, “erməni məsələsi”
Cənubi Qafqazda bütün problemlərin kökündə dayanırdı. Prezident İlham Əliyevin
yürütdüyü siyasətlə bu məsələ birdəfəlik həll edildi. Ermənistan və onun
havadarlarının Cənubi Qafqazda ikinci erməni dövləti yaratmaq niyyətləri puç
oldu. Azərbaycanın vətəndaş cəmiyyəti Müzəffər Ali Baş Komandan, Prezident
İlham Əliyevlə fəxr edir. Bu gün Azərbaycan dünyada təhlükəsizlik adası,
əmin-amanlıq diyarı kimi tanınır. O qədər də uzaq olmayan bölgələri,
coğrafiyanı qanlı hadisələr, aramsız böhranlar, təlatümlər bürüyüb. Azərbaycan
isə gündən-günə güclənir, inkişaf etmiş dövlətə çevrilmək yolunda sürətlə
irəliləyir. Ulu öndər Heydər Əliyev yolu və Prezident İlham Əliyevin
qətiyyətli, məqsədyönlü siyasəti Azərbaycanın bütün uğurlarının təməlində
dayanır. Ölkədə gedən ümumi inkişaf vətəndaş cəmiyyəti üçün də yeni imkanlar
açır. Yaradılmış sərbəst və azad mühit QHT-lərin fəaliyyətini, onların
təşəbbüslərini önə çıxarır. Prezident İlham Əliyevin QHT-lərin fəaliyyəti ilə
bağlı çağırışları, fikirləri Azərbaycan QHT-lərinə ictimai etimadı gücləndirir,
vətəndaş cəmiyyəti qərarların qəbulu proseslərində fəal iştirak edir. İctimai
iştirakçılıq ötən 20 ildə xeyli genişlənib. Hazırda 4000-ə yaxın QHT ölkənin
ictimai həyatında yer alır.
Azərbaycan QHT-ləri bu gün bir çox sahələrdə cəmiyyət həyatına layiqli
töhfələri ilə seçilir, beynəlxalq miqyasda uğurlar qazanırlar. Azərbaycan Milli
QHT Forumu olaraq bəyan edirik ki, ölkəyə böyük tarixi qələbələr qazandıran
Prezident İlham Əliyevin siyasətini tam müdafiə edirik, bu siyasətin davam
etməsi hər birimizin ümumi arzusu, istəyi, mövqeyidir. Biz Sizinləyik, cənab
Prezident!”
Forumda o da qeyd olunub ki, 7 fevral 2024-cü il tarixində keçiriləcək
növbədənkənar prezident seçkisi indiyədək olan bütün seçkilərdən fərqlənir. Bu
seçkilər ilk dəfə respublikanın bütün suveren ərazisində təşkil olunacaq. Bu,
böyük tarixi hadisədir. Azərbaycan Milli QHT Forumu Azərbaycan vətəndaşlarını
bu tarixi prosesin bir hissəsinə çevrilməyə, səsvermə günü seçkilərdə fəal
iştiraka çağırıb.