“Qəbələ” klubu müdafiəçi Ürfan Abbasovla yollarını ayırıb.
ÇıxışYolu.Com xəbər verir ki, futbolçu 2019/2020-ci illər mövsümündən “qırmızı-qara” formada çıxış etməyəcək.
27 yaşlı cinah müdafiəçisi 2011/2012 mövsümündən bu komandanın şərəfini qoruyurdu. O, bu müddətdə 220 matçda meydana çıxıb. Müdafiəçinin hesabında üç qol var. Abbasov Premyer Liqada 177, kubokda 28, Avropa Liqasında 15 matça çıxıb. Ürfan bütün qollarını ölkə çempionatında vurub.
O, “Qəbələ”də keçirdiyi səkkiz mövsümdə Premyer Liqanın beş mükafatını qazanıb. Müdafiəçi 2016/2017 və 2017/2018 mövsümlərində gümüş, 2013/2014, 2014/2015 və 2015/2016 mövsümlərində bürünc medala yiyələnib. Abbasov 2018/2019 mövsümündə Azərbaycan kubokunun qalibi, 2013/2014, 2016/2017 və 2017/2018 mövsümlərində finalçısı olub.
Abbasov artıq “Səbail”lə müqavilə bağlayıb. Onun yeni müqaviləsi bir illik nəzərdə tutulub.
Qeyd edək ki, maliyyə problemləri yaşayan “Qəbələ” daha əvvəl kapitanı Cavid Hüseynov və Elvin Camalovu yola salmışdı. Hər iki futbolçu artıq “Zirə” klubu ilə müqavilə bağlayıb.
Səbuhi MUSAYEV