Aleksandr Tarakanov oktyabrın 11-dən yunan-Roma güləşi üzrə yığmamızda baş məşqçi fəaliyyətinə başlayıb.
ÇıxışYolu.Com xəbər verir ki, sıx məşq qrafiki iilə hazırlıq keçən təcrübəli mütəxəssis Azərbaycan Güləş Federasiyasının rəsmi saytına açıqlama verib.
Aleksandr Petroviç yeni komandasıyla bağlı ilk təəssüratlarını bölüşməklə yanaşı, hazırlıq planından söz açıb:
“1993-1994-cü illərdə Türkiyə yığmasında köməkçi-məşqçi kimi işləmişəm. Ancaq Rusiya xaricində ilk dəfə baş məşqçi kimi çalışıram. Azərbaycan yığması yaxşı komandadır. Burda güləşçilərin fərqli texniki bacarıqları var.
Hələ SSRİ dönəmində yetişmiş güclü yunan-Roma güləşçilərimizin davamçılarını görməkdəyik. Onlar öz bacarıqlarını yeni nəslə ötürüb. Yeganə mənfi məqam Olimpiadaya lisenziya qazanılmamasıdır. Halbuki millidə güclü güləşçilər var və mənə elə gəlir ki, biz bu missiyanın öhdəsindən gələcəyik.
Müşahidələrimə əsasən deyə bilərəm ki, güləşçilərin fiziki hazırlığı qaydasında olsa da, döşək üzərində məşqlərə daha çox ehtiyac var. Bəlkə, məhz xalça üzərində məşqlər yetərincə olmadığı üçün dünya çempionatında nəticə ürəkaçan olmadı. Ancaq güləşçilərin təcrübəsinə söz ola bilməz.
Həftəlik məşqlərə gəlincə, çərşənbə və şənbə günləri bir məşqimiz olur. Qalan günlər iki, bəzən isə üç hazırlıq prosesi baş tutur. İndi yüklənmə dövrünü keçirik. Azərbaycan çempionatından sonra Minskdə təlim-məşq toplanışı keçməyi planlaşdırırıq.
Rusiyanın baş məşqçisi ilə də birgə hazırlıqla bağlı danışıqlar aparırıq. Ustalıq səviyyəsini artırmaq üçün belə toplanışlara ehtiyac var. Dekabrda keçiriləcək Azərbaycan çempionatında bütün yığma üzvlərinin iştirakı nəzərdə tutulub. Çünki bu yarışın nəticələrinə əsasən millinin heyəti yenidən formalaşdırılacaq.
Daha sonra isə Avropa çempionatı və bizim üçün daha böyük önəm kəsb edən lisenziya turnirlərinə hazırlığa başlayacağıq. Uşaqlar məşqlərdə belə həvəslə işləməyə davam etsə, lisenziyaları qazanacaqlar. Bizdə xüsusən 60, 67, 87 və 130 kq-da rəqabət güclüdür və yaxşı perspektiv var”.