Muxtar Məmmədov: “Silahların İsraildən alınması normaldır”
“Azərbaycan əvvəldən bəyan edib ki, başqa ölkələrin daxili işlərinə
qarışmayacaq və öz ərazisinin başqa dövlətlərə qarşı istifadəsinə imkan
verməyəcək”.
Cixisyolu.com-ın məlumatına görə, bunu Azərbaycanın İsraildəki səfiri Muxtar Məmmədov
“Jerusalem Post”
müsahibəsində bildirib.
Azərbaycanın İsraildən aldığı silahların və ya onları İsraildən daşıyan
təyyarələrin sayına gəlincə, M.Məmmədov dəqiq sayı barədə məlumatı olmadığını
deyib. Bununla belə, o, İsrailin ölkənin aparıcı silah təchizatçılarından biri
olduğunu təsdiqləyib.
Nəşr yeri gəlmişkən Stokholm Beynəlxalq Sülh Araşdırmaları İnstitutunun
hesabatına istinadla bildirib ki, 2011-2020-ci illər arasında Azərbaycanın əsas
silah idxalının 27%-i İsrailin payına düşüb. Bununla belə, tədarüklərin
əksəriyyəti 2016-2020-ci illər arasında həyata keçirilib, o zaman Azərbaycanın
əhəmiyyətli silah idxalının 69%-i İsrailin payına düşüb.
Hesabata görə, digər əsas tədarükçülər Rusiya, Türkiyə və Belarus olub.
M.Məmmədov Azərbaycanın İsraildən silah alması ilə bağlı narahatlığı
anlamadığını deyib.
“Hər bir ölkə öz ərazi bütövlüyünün və vətəndaşlarının suverenliyinin
qorunmasına və müdafiəsinə cavabdehdir. Bu mənada, Azərbaycan da istisna deyil.
İsrail çoxlu silah istehsal edir, ona görə də bu silahların İsraildən alınması
normaldır”, – deyə səfir bildirib.
Bu silahların 2020-ci ildə Ermənistanla müharibə zamanı ölkənin ərazilərini
geri almasına kömək edib-etməməsi ilə bağlı suala cavabında Məmmədov bildirib
ki, Azərbaycanın qələbəsi Prezident İlham Əliyevin strateji hərbi
rəhbərliyinin, eləcə də ordunun imkanlarının, silah-sursatının və hazırlığının
nəticəsidir.
“Bizi orduya külli miqdarda pul xərcləməkdə ittiham etdilər. Biz isə cavab
verdik ki, dünya (Ermənistanla) müharibənin həllində bizə kömək etməyib. Əgər
müharibə, işğal, ərazilərimizə və vətəndaşlarımıza qarşı təhlükə olmasaydı,
ordumuza bu qədər pul xərcləməzdik. Qlobal xəritəyə baxsanız, daha təhlükəsiz
bölgələrdə yerləşən dövlətlərin (hərbiyə) daha az xərclədiyini görərik. Təəssüf
ki, bizim belə şansımız yoxdur”, – deyə səfir qeyd edib.