“Roma” və “Napoli” azarkeşlərinin səfər matçlarında iştirakı qadağan olunacaq
İtaliyanın daxili işlər naziri Matteo Piantedosi “Roma” və “Napoli” futbol
klublarının azarkeşlərinin səfərdə liqa oyunlarına gəlməsini iki aylıq qadağan
edəcəyini açıqlayıb.
“Bu gün mən “Roma” və “Napoli” azarkeşlərinə növbəti iki ay ərzində səfər
oyunlarında iştirakı qadağan edən əmri imzalayacağam”, – deyə nazir bildirib.
Bu qərara bir həftə əvvəl hər iki klubun fanat qruplarının İtaliyanın mərkəzi
magistralı kənarındakı kafedə dava salması, yolun müvəqqəti bağlanmasına və çox
kilometrlik tıxacın yaranmasına gətirib çıxaran insident səbəb olub. Hər iki
tifozi qrupu komandalarının ayrı-ayrı şəhərlərdə baş tutacaq fərqli matçlarında
iştirak etmək üçün yola çıxıb. Lakin onların yolu bir məntəqədə kəsişib və
nəticədə bir azarkeş xəsarət alaraq xəstəxanaya aparılıb.
Futbol xuliqanlığının son epizodu İtaliyada yeni mübahisə dalğasına səbəb olub
və hökumət belə epizodların ciddi şəkildə yatırılacağını açıqlayıb.
Mənbə: TASS