Səfir Rəşad Məmmədov Türkiyəyə yardımdan danışıb: “Azəraycanda olmayan
ləvazimatları xaricdən sifariş veririk”
“Əlimizdə olmayan vasitələr təcili surətdə xaricdən alınır və zəlzələ
bölgəsinə çatdırılır”.
“Report” xəbər verir ki, bunu Azərbaycanın Türkiyədəki səfiri Rəşad Məmmədov
“Milliyət”ə müsahibəsində deyib.
Ovurğulayıb ki, Azərbaycan və Türkiyə qardaş ölkələrdir:
“Qardaş qardaşa dəstəyinin hesabatını verməz. Azərbaycan bunları qardaşlıq
vəzifəsi olaraq yerinə yetirir. Nə lazımdırsa, etməyə davam edəcəyik”.
Diplomat söyləyib ki, zəlzələ bölgəsində ehtiyac olan bir çox ləvazimat
Azərbaycan bazarında tükənib:
“Ona görə də xaricdən sifariş verməli oluruq. Azərbaycan və Türkiyə
xalqlarının bir-birinə sevgisi bu səviyyədədir. Türkiyə güclü dövlətdir.
Türkiyə bu zəlzələnin də təsirlərini qısa zamanda aradan qaldıracaq. Azərbaycan
da bunun üçün əlindən gələni edəcək”.
Qeyd edək ki, fevralın 6-da ocağı Türkiyənin Kahramanmaraş şəhərinin Pazarcık
rayonunda olan 7,7 maqnitudalı və 9 saat sonra episentri eyni şəhərin Elbistan
rayonu olan 7,6 maqnitudalı iki zəlzələ olub.
Güclü yeraltı təkanlardan sonra bölgədə 6,6 maqnitudayadək 6 000-dən çox
afterşok qeydə alınıb. İki zəlzələ həmçinin Livan, Kipr, İraq, İsrail,
İordaniya, İran və Misirdə hiss edilib.
Təbii fəlakət Türkiyə və Suriyada böyük dağıntı və onminlərlə itkiyə səbəb
olub. Türkiyənin zəlzələ baş verən 10 şəhərində 3 aylıq fövqəladə vəziyyət elan
olunub.
Bu hadisə Türkiyədə 1939-cu ildən bəri qeydə alınan ən güclü zəlzələ kimi
tarixə düşüb.
Zəlzələdən dərhal sonra Azərbaycanda qardaş ölkə üçün yardım toplanmasına
başlanılıb. Hadisə nəticəsində 44 218 nəfər ölüb.