Sənətçilərin bayram ab-havası: “Novruzda evdə oluram ki, yeddi il ailəmdən
didərgin düşməyim” – Sorğu + FOTO
Milli adət-ənənələrimizi özündə əks etdirən Novruz bayramına 2 gün qalır.
Novruz bayramı bayram fəslinin müjdəçisi və simvoludur. Hər il olduğu kimi bu
il də məşhurların bayramı harada keçirəcəkləri maraq doğurur.
Cixisyolu.com-ın əməkdaşı bir neçə sənət adamının planları ilə maraqlanıb.
Əməkdar artist Xumar Qədimova başqa bir ölkədə rahatlıq tapmayacağını ifadə
edib:
“Bayramı evdə ailəmlə keçirəcəyəm. Başqa harada keçirə bilərəm? Doğmalarımla
keçirəcəyəm. Milli adət-ənənələrimizi özündə əks etdirən Novruzu başqa ölkədə
keçirsək, çox gülünc olar. Xaricə getməyə ehtiyac yoxdur. Ən gözəl ölkə elə
Azərbaycandır. Öz doğma bayramımızı doğma vətəndə keçirməliyik. Özü də plov
yeyə-yeyə”.
X.Qədimova bayramda tədbirlərdə olmayacağını söyləyib:
“Bayramı evdə keçirərlər. Tədbirdə olmayacağam. Digər şəhərlərə getməyə
ehtiyac yoxdur. Başqa heç bir yerdə rahatlıq tapa bilmərik. Ən rahat yer
evimizdir”.
Əməkdar artist Nahidə Orucova isə Bakıdan kənara çıxa bilməyəcəyi üçün
təəssüflənib:
“Bayramı hər il olduğu kimi bu il də orada-burada qarşılayacağam. Bayram
çəkilişlərində olacağam. Bizim həyatımız budur. Evdən, ailədən məhrum
insanlarıq. Bakıdan kənara çox istəyərdim ki, çıxım. Lakin imkan yoxdur”.
Aktrisa Çimnaz Sultanova qeyd edib ki, hər il evdə olur ki, 7 il ailədən
didərgin düşməsin:
“Bayramı evdə keçirəcəyəm. Bu, mənim üçün ən əziz bayramdır. Ailəmlə olacağam.
Belə bir inanc var ki, kim Novruzu evdə keçirməsə, 7 il ailəsindən didərgin
düşəcək. Bacardığım qədər hər il bayramı ailəmlə birlikdə keçirirəm. Çünki bu,
mənim üçün çox önəmlidir”.
Ç.Sultanova bayram üçün ata ocağına toplaşdıqlarını əlavə edib:
“Mən bakılıyam. Bakının kəndlərində bayram martın 21-də qeyd olunur. Martın
20-si bayram axşamı kimi yığışırıq. Hər il ata yurduna toplaşırıq. Dünyanın
harasında oluruqsa, bayramda ata evinə toplaşırıq. Bu bayramı xüsusi qeyd
edirik. Başqa bir şəhərə, rayona getmirəm. Ancaq öz doğma yurdumuzda, ata
ocağımızda bayramı qarşılayıram”.
Müğənni Ayaz Babayev Novruzda hər il papaq atdığını söyləyib:
“İllərdir ki, bayramda səhnədə oluram. Səhnədən sonra ailəmlə süfrə masasında
olmaq adət halını alıb. Sonra dostlarımla görüşəcəyəm. Maraqlı məqam odur ki,
10 ildir mən papaq atıram. Elə bir bayram yoxdur ki, mən papaq atmayım. Novruzu
çox sevirəm. Milli adət-ənənələrimizi özündə əks etdirən ən gözəl bayramdır.
Tonqal ətrafına toplaşacağıq. Novruzun adət – ənənələrini çox sevirəm”.
Nəzrin Vahid
