Xəbər verdiyimiz kimi bu gecə Nəsimi rayonu Cəlil Məmmədquluzadə küçəsində yolun hərəkət hissəsində çökmə qeydə alınıb.
Çökmə 2-3 metr dərinlikdə və təqribən 150 kv.m sahədə baş verib.
ÇıxışYolu.Com xəbər verir ki, bu gün günorta saatlarında Azərbaycan Avtomobil Yolları Dövlət Agentliyinin mətbuat katibi Anar Nəcəflinin verdiyi məlumata əsasən, sözügedən yol 7-8 il bundan öncə “Bakı Metropoliteni”nin sifarişi ilə metro tikintisi səbəbindən alternativ yol olaraq salınıb.
Lakin “Bakı Metropoliteni” QSC-nin mətbuat xidməti və ictimaiyyətlə əlaqələr şöbəsinin rəisi Bəxtiyar Məmmədov məlumatı təkzib edərək bunun metropolitenlə heç bir əlaqəsi olmadığını deyib.
Hazırda çökmənin hansı səbəbdən baş verdiyi məlum deyil. Hər iki qurum rəsmisi sosial şəbəkələrdə çökmənin fəaliyyət göstərdikləri qurumla əlaqəsi olmadığını iddia edir.
“O yolu nə Saleh Məmmədov, nə də ki, Azəravtoyol çəkib. Yol 7-8 il bundan öncə metronun tikintisi ilə əlaqədar alternativ yol kimi Bakı Metropoliteni tərəfindən salınıb. Bir də ki, yolun çəkilişində problem olsaydı heç bir il keçməmiş çökməli idi. Çökməyə səbəbin nə olduğu gün ərzində açıqlanacaq. Öncədən səbəb bilinməyə-bilinməyə kimisə ittiham etmək düzgün deyil”- deyə Anar Nəcəfli “Facebook”da şərh olaraq qeyd edib.