“Qarabağ” sabah Avropa Liqasının pley-off turu çərçivəsində Moldovanın “Şerif” kollektivinin qonağı olacaq. Yerli azarkeşlər oyunu “CBC Sport” kanalından izləyəcəklərinə ümid etdiyi vaxtda Moldova tərəfindən azarkeşləri üzəcək xəbər gəlib.
Belə ki, “Şerif” – “Qarabağ” oyunu ölkəmizdə yayımlanmayacaq.
ÇıxışYolu.Com xəbər verir ki, bu barədə oyunu yayımlayacağı gözlənilən “CBC Sport” telekanalı bəyanat yayıb.
Bəyanatda deyilir:
“UEFA Avropa Liqasının pley-off mərhələsinin avqustun 23-də keçiriləcək “Şerif” – “Qarabağ” görüşünü yayımlaya bilməyəcəyik. Bunun səbəbi oyunun yayım hüququna malik olan “Şerif” Futbol Klubunun yayım üçün çox böyük məbləğ istəməsidir. Moldova klubunun tələb etdiyi məbləğ bu səviyyədə bir oyun üçün real məbləğin 10 qatıdır.
“CBC Sport” telekanalı qarşı tərəfə əvvəlcə siqnal mübadiləsi, sonra isə daha aşağı məbləğ təklif etsə də, “Şerif” FK Moldova kanallarının heç birinin Bakıdakı görüşə maraq göstərməməsini əsas gətirərək ilk oyunun çəkilişinə və yayımına görə bizdən tələb etdiyi məbləğdə güzəştə getmədi.
Ötən il də bu komandaların UEFA Çempionlar Liqasının 3-cü təsnifat mərhələsindəki oyununda buna bənzər hadisə yaşanmış, yenə “Şerif” FK-nın istədiyi qeyri-real məbləğ səbəbindən oyunun Azərbaycana yayımı baş tutmamışdı.
Hazırda ölkəmizdə bu oyuna maraq göstərən kanallar üçün danışıqlar prosesi açıq olaraq qalır. Amma təəssüf hissi ilə bəyan edirik ki, “Şerif” – “Qarabağ” görüşü yuxarıda qeyd olunan səbəblərlə əlaqədar “CBC Sport” kanalında yayımlanmayacaq. İzləyicilərimizin, azarkeşlərin və futbol ictimaiyyətinin bu qərarı anlayışla qarşılayacağına ümid edirik”.