Tender adı ilə aldığı 240 mini kazinoda uduzan şəxslə bağlı QƏRAR
Bakı Apellyasiya Məhkəməsində dələduzluqda təqsirləndirilən Mövsüm Mövsümovun
barəsindəki hökmdən verilən apellyasiya şikayətinə baxılıb.
Pravda.az-ın əldə etdiyi məlumata görə, hakim Ziya Şirinovun sədrliyi ilə
keçirilən prosesdə qərar elan olunub.
Qərara əsasən, onun apellyasiya şikayəti təmin edilməyib.
Bakı Ağır Cinayətlər Məhkəməsinin hökmü ilə o, səkkiz il müddətinə azadlıqdan
məhrum edilib.
Qeyd edək ki, Mövsümov Mövsüm Vaqif oğlunun etibardan sui-istifadə etmə və
aldatma yolu ilə özgənin əmlakını ələ keçirib külli miqdarda maddi ziyan
vurmaqla dələduzluq əməlini törətdiyinə dair əsaslı şübhələr müəyyən edilib.
Bununla bağlı Daxili İşlər Nazirliyinin Baş İstintaq və Təhqiqat İdarəsində
barəsində Cinayət Məcəlləsinin 178.3.2 (dələduzluq külli miqdarda ziyan
vurmaqla törədildikdə) maddəsi ilə təqsirləndirilən şəxs qismində cəlb olunması
haqqında qərar qəbul edilməklə cinayət təqibi orqanından gizləndiyinə görə
beynəlxalq axtarış elan edilib.
2021-ci ilin may ayında şəxs Ukrayna ərazisində müəyyən edilərək həbs edilib.
İttihama görə, Mövsüm Mövsümov Nabil Quliyevə Şəki şəhərində tikiləcək, smeta
dəyəri 6 200 000 manat olan 960 şagirdlik orta məktəbin tikintisi ilə bağlı
keçiriləcək tender müsabiqəsində zərərçəkmişin yaradacağı şirkəti Təhsil
Nazirliyində yüksək vəzifədə işləyən, şəxsiyyəti istintaqa bəlli olmayan
tanışının vasitəsi ilə qalib etdirəcəyi barədə yalandan vəd verib. Mövsüm
zərərçəkmişi aldadaraq 1 dekabr 2020-ci il tarixdə, saat 16 radələrində “Təməl”
yaşayış kompleksinin zirzəmisində onun ümumilikdə 240 000 manat məbləğində
pulunu dələduzluq yolu ilə ələ keçirib.
Məhkəmə iclasında Mövsüm Mövsümov elan olunmuş ittiham üzrə özünü qismən
təqsirli bilib və ibtidai istintaq zamanı verdiyi ifadəsini təsdiq etdiyini
deyib.
O qeyd edib ki, mobil telefon vasitəsilə kazino oyunu oynadığından Nabildən
götürdüyü puldan təxminən 10 000 min manatını həmin gün uduzub:
“Sonrakı günlərdə yenə də kazino oynamağa davam etdim. Pulların hamısını yenə
uduzdum. Təxminən 43-44 min ABŞ dolları pul qaldı. Bundan sonra Ukraynaya
getdim. Ukraynaya getdikdən sonra qərara gəldim ki, əlimdə qalan pulla iş
qurub, qazanıb Nabilin pulunu qaytarım. Əvvəllər ABŞ-nin Nyu-York ştatında uzun
illər yaşadığımdan orada yaşayan tanışım İlqara 28 000 ABŞ dolları pul
göndərdim ki, oradan xeyriyyə fondları tərəfindən yığılmış və istifadə olunmuş
geyimlərdən Ukraynaya göndərsin və “Second hand” mağazalarına paylamaqla satım.
İlqar ABŞ-də xeyriyyə fondlarından paltarları yığmaqla məşğul olmağa başladı.
28 may 2021-ci il tarixdə Ukraynanın Rovno Vilayət Polis İdarəsinə immiqrasiya
məsələsi ilə bağlı yaxınlaşarkən saxlanıldım və məlum oldu ki, Azərbaycan
Daxili İşlər Nazirliyinin Baş İstintaq və Təhqiqat İdarəsi tərəfindən barəmdə
axtarış elan edilib. Təxminən altı ay Ukraynanın Rovno vilayətində istintaq
təcridxanasında saxlanıldıqdan sonra Bakı şəhərinə köçürüldüm”.