Vəkilliyə qəbulla bağlı staj müddəti azaldılmalıdır.
ÇıxışYolu.Com-ın məlumatına görə, bunu Vəkillər Kollegiyası (VK) Rəyasət Heyətinin geniş tərkibli iclasında Kollegiyanın sədri Anar Bağırov bildirib.
A.Bağırov deyib ki, Vəkillər Kollegiyası bu barədə qanunvericilik təşəbbüsü ilə çıxış edən subyektlərə müraciət edəcək:
“Vəkilliyə qəbulla bağlı staj müddətinin azaldılmasına ehtiyac var”.
Qeyd edək ki, hazırda vəkilliyə qəbulla bağlı üç il staj tələb olunur.
A.Bağırov vəkillərin peşə bayramı gününə ehtiyac duyulduğunu bildirib:
“Təəssüflər olsun ki, bu məsələdə də vəziyyətə ürəkaçan deyildi. Bunu dəfələrlə dilə gətirmişdim. Digər tanınmış vəkillərimiz də vəkillərin peşə bayramının, peşə gününün vacibliyini söyləyirdilər.
Odur ki, biz arxivin araşdırılmasına və bu araşdırmaları aparmaq üçün üç nəfər vəkildən ibarət komissiyanın yaradılmasına qərar verdik. Ötən dövrdə komissiya arxivi, Cümhuriyyət dövrünü araşdırdı və çox gözəl materiallar, faktlar əldə etdi.
Məlum oldu ki, Cümhuiriyyət illərində Azərbaycanda 100-ə yaxın vəkil fəaliyyət göstərib. Ancaq onların cəmi doqquzu azərbaycanlı olub. Həmin vəkillər arasında Cümhuriyyət dövrünün qurucuları da olub.
Beləliklə, komissiya 30 iyul 1919-cu il tarixinin Azərbaycan vəkilliyinin yaranma tarixi kimi götürülməsi və bu səbədən 30 iyulun bundan sonra vəkillərin peşə bayramı kimi qeyd olunması təklifi ilə Rəyasət Heyəti qarşısında çıxış edib. İndi Rəyasət Heyəti həmin təklifə münasibət bildirməlidir”.
VK-nın Rəyasət Heyəti də həmin təklifi müsbət qarşılayıb və 30 iyulun vəkillərin peşə günü kimi qeyd olunması qərara alınıb.
Kamil HƏMZƏOĞLU
www.ÇıxışYolu.Com