Türkiyə və ABŞ münasibətlərində olan fikir ayrılıqlarının aradan qaldırılması üçün Vaşinqtonda vacib görüşlər keçiriləcək.
ÇıxışYolu.Com “Anadolu” xəbər agentliyinə istinadən xəbər verir ki, Türkiyə və ABŞ hökumət nümayəndələri arasında görüş 8-9 mart tarixlərinə planlaşdırılır.
Münasibətlərin normallaşdırılması məqsədilə 3 texniki komitənin yaradılması haqqında qərar ABŞ dövlət katibi Reks Tillersonun 15-16 fevral tarixlərində Ankaraya etdiyi səfər zamanı qəbul olunub.
Komitələrin hədəfi eyni zamanda “FETO” ya qarşı mübarizə ilə bağlı tərəflərin mövqelərinin bir-birinə yaxınlaşdırılması, həmçinin İraq və Suriya ilə bağlı siyasətdə koordinasiyaya nail olmaqdır.
Məlumata görə, Vaşinqtonda keçiriləcək 2 günlük görüşdə Türkiyə və ABŞ-ın Suriya üzrə texniki komitəsinin üzvləri bir araya gələcək.
Danışıqlarda eyni zamanda Suriyanın Mənbic rayonunun PYD/PKK terrorçularından azad edilməsi məsələsi ilə bağlı müzakirələr aparılacaq.
Bundan əvvəl Türkiyə XİN Mövlut Çavuşoğlu ABŞ-Türkiyə münasibətlərinin normallaşması üçün Mənbic məsələsinin prioritet mövzu olduğunu bildirmişdi.