Cümə axşamı minlərlə nümayişçi Saad Haririnin koalisiya hökumətinin vergi siyasəti ilə razı olmadığını bildirmək üçün Livan paytaxtının küçələrinə çıxıb.
TASS-ın “Al Mayadeen” telekanalına istinadla verdiyi məlumata görə, kütləvi narazılığın səbəblərindən biri, hakimiyyətin “WhatsApp”a ayda 6 dollar məbləğində vergi tətbiq etmək qərarıdır.
Mitinqdə qəzəbli kütlə: “Xalq rejim dəyişikliyi istəyir!”, – deyərək Riad Solha meydanında, hökumət sarayının və parlament binasının yanında üsyana başlayıb. Nümayişçilərlə asayiş keşikçiləri arasında zaman-zaman qarşıdurmalar yaranıb.
Etirazçılar şəhərin mərkəzi və ətraf yollarının bir hissəsini bağlayıblar. Nümayişçilər Beyrutu ölkənin cənub və şimal bölgələri ilə birləşdirən magistral yolları, həmçinin Dəməşqə dağ keçidindən keçən strateji magistral yolu yanan təkərlərlə bağlayıblar. Bəzi ərazilərdə etiraz hərəkatının fəalları yol kənarında düşərgələr qurublar.
Sonradan Livan təhlükəsizlik qüvvələrinin etirazçıları dağıtmaq üçün gözyaşardıcı qaz və rezin dəyənəklərdən istifadə etdiyi məlum olub.
Livan Qırmızı Xaç Komitəsinin TASS-a verdiyi məlumata görə, hüquq-mühafizə orqanlarının əməkdaşları ilə toqquşmalarda xəsarət alan 70-dən çox insana yerindəcə yardım göstərilib, 23 nümayişçi isə xəstəxanalara aparılıb.
Livan Proqressiv Sosialist Partiyasının lideri Valid Cumblat Beyrut və digər şəhərlərdəki küçə etirazlarını “vətəndaş üsyanı” adlandırıb. Millət vəkili Hüseyn Həcc Həsən isə öz növbəsində, hökuməti vergi planını əhalinin həyati mənafelərinə uyğun olaraq yenidən baxmağa çağırıb:
“Büdcə kəsiri problemini yoxsulların hesabına həll etmək lazım deyil”.
Daxili işlər naziri Raya əl-Hassan yerli televiziya kanallarında yayımlanan açıqlamada ölkədəki vəziyyətin hakimiyyətin nəzarətində olduğunu və baş nazirin istefa vermək niyyətində olmadığını vurğulayıb:
“Bəzi yerlərdə baş verən iğtişaşlara baxmayaraq, nümayişlər ümumilikdə dinc xarakter daşıyır. Livan indi dilemma ilə qarşı-qarşıyadır: ya çətin qərarlar qəbul edəcək, ya da dağılacaq”.
Bu arada, kütləvi mitinqlər fonunda Livan Telekommunikasiya naziri Məhəmməd Şükir gecə “WhatsApp”la bağlı vergi qərarının ləğv olunduğunu elan edib.
