Zədələnmiş, cırılmış, ləkəli pullar: Onları necə dəyişək? – “Kaspi”nin
ARAŞDIRMASI + FOTO
Bizim WhatsApp kanalımıza buradan abunə ola bilərsiniz
Azərbaycan Mərkəzi Bankının (AMB) Kollegiyası “Pul nişanlarının tədavülə
yararsızlıq əlamətləri, dəyişdirilməsi və ekspertizası Qaydaları”nda dəyişiklik
edib. Bununla bağlı AMB-nin sədri Taleh Kazımov yeni qərar imzalayıb.
Qərara əsasən, Azərbaycanda kağız pul nişanlarının yararsız hesab olunması
üçün müəyyənləşdirilmiş kriteriyalardan beş faizə qədər kənarlaşma olduqda
nişan yararsız hesab ediləcək. İndiyə qədər bu halda nişan tədavülə yararlı
hesab olunurdu.
Eyni zamanda, ön və yaxud arxa tərəfində kimyəvi təsir nəticəsində rəngini
dəyişmiş, çirklənmiş və ya korroziyaya məruz qalmış, eləcə də fiziki
deformasiyaya uğramış (əzilmə, deşilmə və s.), hissələrə ayrılmış və ya hər
hansı bir hissəsi itirilmiş və yanmış, cilalanmış, hansısa kənar təsir
nəticəsində vizual görünüşünü itirmiş, lakin nominalı aydın görünən metal pul
nişanları da yararsız hesab ediləcək.
Təbii ki, bir çox şəxslərdə zədələnmiş, cırılmış pullar olur. Bəzən cırılan
pulun bir hissəsi də itir.
Bəs zədələnmiş pullarımızı necə dəyişək? Hansı halda Mərkəzi Bank vətəndaşdan
pulu qəbul edib, dəyişə bilər, hansı hallarda bu mümkün deyil?
“Kaspi”
mövzu ilə bağlı məqalə dərc edib.
Zədəli pullar, beş faiz kriteriya…
Hüquqşünas Nicat Ələkbərzadə açıqlamasında bildirib ki, pul əsginasları
tez-tez kənar təsirlərə məruz qalaraq istifadəyə yararsız hala düşürlər, bəzi
hallarda isə zədənin təsirindən rəqəmlər belə oxunmur: “Qanunvericilikdə cırıq,
zədəli və ləkəli şəkildə olan pul nişanlarının tədavülü ilə bağlı tələblər
mövcuddur. Qəbul edilən son dəyişikliyə əsasən, Azərbaycanda kağız pul
nişanlarının yararsız hesab olunması üçün müəyyənləşdirilmiş kriteriyalardan
beş faizə qədər kənarlaşma olduqda nişan yararsız hesab ediləcək. İndiyə qədər
bu halda nişan tədavülə yararlı hesab olunurdu.
Mövcud qanunvericiliyə əsasən, yararsız milli pul nişanları dəyişdirilməsi
üçün banklara və ya Mərkəzi Banka təqdim edilə bilər. Pulların dəyişdirilməsi
onların həqiqiliyinin və nominal dəyərinin ödənilməsi yoxlanılmaqla həyata
keçirilir. Milli pul nişanlarının dəyişdirilməsi əməliyyatları bankların və
Mərkəzi Bankın daxili reqlamenti ilə müəyyən edilmiş iş saatlarında həyata
keçirilir. Həmin vaxt ərzində dəyişdirilməyən pul nişanları təqdim edən şəxsə
qaytarılır”.
Korlanmış pulla bağlı ekspert rəyi necə verilir?
“Təqdim edilmiş və saxta olmayan, bütöv bir hissədən ibarət səthinin 60%-dən
az olmayan hissəsinin və ya eyni pul nişanına məxsus hissələrdən ibarət
səthinin 100%-ni saxlamış kağız pul nişanlarının, habelə saxta olmayan, səthini
100% saxlamış, ön, arxa və kənar haşiyəsinin təsvir və yazıları silinmə və ya
deformasiyaya uğramamış metal pul nişanlarının nominal dəyəri ödənilir. Bundan
əlavə, milli pul nişanlarının saxta olması və ya səthinin 100%-ni saxlamış pul
nişanının hissələrinin eyni pul nişanına məxsus olması barədə ekspert rəyi
Mərkəzi Bank tərəfindən verilir”, – deyə hüquqşünas əlavə edib.
Köhnə pullar və qoyulan tarix
N.Ələkbərzadə vurğulayıb ki, Mərkəzi Bank xüsusi qablaşdırma vahidlərində
tədavülə yararsız hala düşmüş kağız milli pul nişanlarını ekspertizaya yalnız
banklardan qəbul edir: “Köhnə pulları da müraciət əsasında dəyişdirmək
mümkündür. Ümumiyyətlə, pullar dövriyyədən tədricən, müəyyən zamanla çıxarılır
və ya son dəyişdirmə tarixi qoyulur ki, bu tarixədək dəyişmək mümkün olsun”.
Qeyd edək ki, Mərkəzi Bankın Bakı şəhərində “Nağd pul ofisi” çərşənbə axşamı,
çərşənbə və cümə axşamı günləri saat 10:00-dan 13:00-dək fəaliyyət göstərir.
60 faiz tələbi
İqtisadçı ekspert Eldəniz Əmirovun sözlərinə görə, zədələnmiş pulların
dəyişdirilməsi üçün müəyyən tələblər var. Əgər bu şərtlər pozulmayıbsa,
əsginasları asanlıqla dəyişmək olar: “Həmin tələblərdən əsas biri pulun
səthinin 60 faizinin sağlam olmasıdır. Eyni zamanda, üzərindəki seriyalardan
biri oxunursa, pullar dəyişdirilir. Burada 60 faiz mütləqdir. Çünki şərtdə 60
faiz həddinin müəyyənləşdirilməsinin səbəbi var. Əgər 50, 40, 30 və daha aşağı
rəqəmlər olarsa, o zaman vətəndaş digər zədəli qalan parça ilə ikinci dəfə eyni
məbləği ala bilər. 60 faiz ilə verilmə avtomatik olaraq 40 faizin istifadəyə
yararsız olması deməkdir. Bu proses Mərkəzi Bankın “Nağd pul ofisi”ndə
reallaşır. Bölgələrdə də bu ofislər fəaliyyət göstərir”.
Ekspert pulun 60 faizinin nəyə əsasən hesablablanmasına da aydınlıq gətirib:
“200 damadan ibarət bir ölçü vahidi var ki, onun üzərinə pulu yerləşdirərək
neçə faizinin zədəli olub-olmamasını bilmək olur”.
Bəs digər banklar?
“Bəs digər kommersiya bankları zədələnmiş pulları dəyişə bilərmi?” sualına
cavab olaraq ekspert qeyd edib ki, bank bunu dəyişə də, dəyişməyə də bilər:
“Çünki kommersiya banklarının belə bir öhdəliyi yoxdur”.
