ABŞ-ın Denton şəhərində naməlum yırtıcı aşkarlanaraq, güllələnib.
ÇıxışYolu.Com xəbər verir ki, bu barədə “Great Falls Tribune” nəşrində məlumat yayılıb.
Alimlər həmin heyvanın mənşəyi ilə bağlı baş sındırsa da, yekun bir nəticəyə gələ bilməyib.
Montana ştatının sakinləri bu müəmmalı heyvanla mayın 16-da rançoların birində qarşılaşıb. Yırtıcının uzun boz çalarlı kürkü, iri kəlləsi və uzunsov çənəsi var.
Heyvan canavara bənzəsə də, qulaqları çox böyükdür, pəncələri və bədəni isə qurdla müqayisədə çox kiçikdir.
“Biz onun nə olduğunu bilmirik. DNT müayinəsinin nəticələrini gözləmək lazımdır”, – deyə vəhşi təbiətin mühafizəsi mərkəzinin əməkdaşı bildirib.
Öldürülmüş yırtıcının sosial şəbəkələrdə yayılan fotoşəkili yerli sakinləri təşvişə salıb. Bəziləri onun qədim əsatirlərdə adı çəkilən “doqman” – insan kimi iki ayağı üzərində gəzən it olduğunu iddia edib.
Yerli mütəxəssislərdən biri isə onun itlə canavarın hibridi olduğunu dilə gətirib.
